ހުމޭޒްގެ ހެޓްރިކާއެކު މަޑަވެލި އަތުން ޓީމު 401 އަށް ފަސޭހަ މޮޅެއް

މިހާރު ކުރިއަށްދާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގައި މިރޭ ކުޅެވުނު ދެވަނަ މެޗުގައި މަޑަވެލި ރަޓު ޓީމާއި ޓީމު 401 ވާދަކުރި މެޗު ފަސޭހަކަމާއެކު 6-2 ގެ ނަތިޖާއަކުން ކާމިޔާބުކޮށް ޓީމު 401 އިން ގުރޫޕްގެ ދެވަނައަށް ކުރިއަށް ޖެހިލައިފިއެވެ.

މުބާރާތުގައި ޓީމު 401 ކުޅުނު ފުރަތަމަ މެޗުގައި އެންމެ ފަހުގެ ރަނަރަޕް އައުޓްލޯޒް އަތުން 3-1 ގެ ނަތީޖާއަކުން އެޓީމު ބަލިވެފައިވާއިރު، ދެވަނަ މެޗުގައި ފޮކްސެސް އާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ. އަދި މަޑަވެލި (ރަޓު ޓީމު)ގެ ފުރަތަމަ މެޗުގައި ފޮކްސެސް އަތުން 1-0 ގެ ންތީޖާއަކުން އެޓީމު މޮޅުވެފައިވާއިރު، ދެވަނަ މެޗުގައި އައުޓްލޯޒް އަތުން އެޓީމު ބަލިވީ 3-0 ގެ ނަތީޖާއަކުންނެވެ.

ތިނަދޫ ސިޓީ އާރު އަވަށު ފުޓްސަލަ ދަނޑުގައި ކުޅެވުނު މިމެޗުގެ ފުރަތަމަ ހާފުގެ ވަރަށް ކުރީކޮޅު ޓީމު 401 އިން ތިން ލަނޑުގެ ލީޑެއް ހޯދިއިރު، ފުރަތަމަ ހާފުގެ ކުޅުން ނިމިގެންދިޔައީ 3-1 ގެ ނަތީޖާއަކުން ޓީމު 401 ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި އެޓީމުން އިތުރު ތިން ލަނޑު ކާމިޔާބުކުރިއިރު މިހާފުގައި މަޑަވެލި ޓީމުން ވެސް ވަނީ އިތުރު އެއްލަނޑު ކާމިޔާބުކޮށްފައެވެ.

އެގޮތުން މިމެޗުގައި ޓީމު 401 ގެ އަލީ ހުމޭޒް ތިން ލަނޑު ކާމިޔާބުކޮށް ހެޓްރިކް ހެދިއިރު، އެޓީމުގެ ޝިމްހާޒް ހަސަން ވަނީ ދެލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު ކާމިޔާބުކޮށްދިނީ ޝިނާޒް މުހައްމަދު އެވެ.

މިގެ އިތުރުން މިމެޗުގައި މަޑަވެލި ޓީމުގެ އަހުމަދު އައިމަން ސައީދު އަދި އެޓީމުގެ ކީޕަރު މުހައްމަދު ރަޝީދު މިއިން ކޮންމެ ކުޅުންތެރިއަކު އެއްލަނޑު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ ޓީމު 401 ގެ އަލީ ހުމޭޒް އެވެ

މިނަތީޖާއެކު ކުޅުނު ދެމެޗުން ޓީމު 401 އަށް ހަތަރު ޕޮއިންޓް ލިބިފައިވާއިރު އެޓީމު މިވަގުތު އޮތީ ގުރޫޕްގެ ދެވަނައިގައެވެ. އަދި މިމެޗުން ބަލިވި މަޑަވެލި ޓީމަށް ދެމެޗުން ލިބުނު ތިން ޕޮއިންޓާއެކު އެޓީމު މިވަގުތު އޮތީ ގުރޫޕްގެ ތިންވަަނައިގައެވެ.

މިމުބާރާތުގައި މިއަހަރު ޖުމްލަ 12 ޓީމަކުން ވާދަކުރަމުން އަންނައިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިން ގުރޫޕުން ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ޖާގަ ލިބިގެންދާނެއެވެ.

ޗެންޕިއަން ޓީމަށް 50،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށައެޅިފައިވާ މިމުބާރާތުގެ ޓައިޓަލް ސްޕޮންސާއަކީ ތިނަދޫ ސިޓީ ކައުންސިލް އެވެ. އަދި އެސޯސިއޭޓެޑް ޕާޓްނާއެއްގެ ގޮތުގައި އިވެންޓްކާސް މޯލްޑިވްސް ހަމަޖައްސާފައިވާއިރު، ފޮޓޯ ގްރަފީ ޕާޓްނަރަކީ ފޮޓޯ މޯލްޑިވްސް އެވެ. އަދި ބެވަރޭޖް ޕާޓްނަރަކަށް ހަތްތަރި ކެފޭ ހަމަޖައްސާފައިވާއިރު، މީޑިއާ ޕާޓްނަރަކީ ގާފު ސްޕޯޓްސް އެވެ.