ތިނަދޫގެ ސިޓީގެ ދަރަޖަ ބާތިލުކުރަން ހައިކޯޓަށް މައްސަލަ ހުށަހެޅި ޑެޕިއުޓީ މިނިސްޓަރު މަގާމުން ވަކިކޮށްފި

ތިނަދޫގެ ސިޓީގެ ދަރަޖަ ބާތިލުކުރަން ހައިކޯޓަށް މައްސަލަ ހުށަހެޅި ޑެޕިއުޓީ މިނިސްޓަރު މުހައްމަދު ރާޣިބު އަހްމަދު މަގާމުން ވަކިކޮށްފި އެވެ.

މިކަން ހާމަކުރެއްވީ ދާދި ދެންމެ އަކު ސަރުކާރުގެ ތަރުޖަމާނު ހީނާ ވަލީދު އެވެ.

ހީނާ އެކްސްގައި ކުރެއްވި ޕޯސްޓެއްގައި ވިދާޅުވީ ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެން، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީގެ ޑެޕިއުޓީ މިނިސްޓަރު އަލްއުސްތާޛު މުހައްމަދު ރާޣިބު އަހްމަދު މިއަދު އެމަޤާމުން ރައީސުލްޖުމްހޫރިއްޔާ ވަކިކުރައްވާފައިވާ ކަމަށެވެ.

ހީނާ މިކަން ހާމަކުރެއްވި އިރު މިއީ ދައުލަތާއި ދެކޮޅަށް ބަގާވާތެއް ކުރުން ކަމަށް ބުނެ ތިނަދޫ ސިޓީގެ މޭޔަރު ސައުދު އަލީ އާއި ތިނަދޫ ދެކުނު ދާއިރާގެ މެމްބަރު އަލްސަން އަހުމަދު ވަނީ ރާޣިބުއާއި މެދު ފިޔަވަޅު އެޅުަމށް މިއަދު ސަރުކާރަާށާއި ރައީސް ޑރ މުހައްމަދު މުއިއްޒު އަށް ގޮވާލާފައި އެވެ.

ސަރުކާރުގެ ޑެޕިއުޓީ މިނިސްޓަރަކަށް ހުންނަވައި ރާޣިބު ގދ. ތިނަދޫގެ އާބާދީގައި 10،000 ހަމަނުވާ ކަމަށްބުނެ އެ ރަށުގެ ސިޓީގެ ދަރަޖަ ބާތިލުކުރަން ހައި ކޯޓަށް ދުސްތޫރީ މައްސަލައެއް ހުށަހެޅުއްވީ މިދިޔަ ބުރާސްފަތި ދުވަހު އެވެ. އޭނާ މައްސަލަ ހުށެހެޅުއްވީ ދައުލަތާއި ތިނަދޫ ކައުންސިލާއި ދެކޮޅަށެވެ.

ޑެޕިއުޓީ މިނިސްޓަރު ރާގިބު ހައިކޯޓަށް ހުށަހެޅި ދުސްތޫރީ މައްސަލާގައި ވަނީ ތިނަދޫއަށް ރައީސް އޮފީހުގެ ގަރާރަކުން ސިޓީގެ ދަރަޖަ ދީފައިވަނީ އާބާދީ އާއި ގުޅޭގޮތުން ދައުލަތުގެ ލިޔުމެއް ގަސްދުގައި އޮޅުވާލައި، ދައުލަތުގެ އިދާރާއަކަށް ދޮގު މައުލޫމާތު ދީގެން ކަމަަށް ތުހުމަތުކޮށް ކައުންސިލާއި ކުރީގެ ރައީސުލްޖުމްހޫރިއްޔާގެ މައްސަލަ ބެލުމަށާއި ތިނަދޫއަށް ދީފައިވާ ސިޓީގެ ދަރަޖަ ބާތިލުކޮށްދޭންށެވެ.

ތިނަދޫއަށް ސިޓީގެ ދަރަޖަ ދިނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ކުރީގެ ރައީސް އިބްރާހިމް މުހައްމަދު ސޯލިހުގެ ގަރާރަކުންނެވެ. އެގޮތުން ސިޓީގެ ދަރަޖަ ދިނުމުގެ ކުރިން ރިޔާސީ އިންތިހާބުގެ ކެމްޕެއިންގެ ތެރޭގައި އޭރުގެ ރިޔާސީ ކެނޑިޑޭޓު އަދި މިހާރުގެ ރައީސް ޑރ މުހައްމަަދު މުއިއްޒު ވެސް ވަނީ ތިނަދޫއަށް ސިޓީގެ ދަރަޖަ ދެއްވާނެކަން އިއުލާނުކުރައްވާފައި އެވެ.

ތިނަދޫއަށް ސިޓީގެ ދަރަޖަ ދެއްވުމަށް ފަހު އޭރުގެ ރައީސް އިބްރާހިމް މުހައްމަދު ސޯލިހު ވިދާޅުވެފައިވަނީ ލާމަރުކަޒީ ގާނޫނުގައިވާ ބުނާ ހުރިހާ ޝަރުތުތަކެއް ފުރިހަމަ ވާތީ ތިނަދޫ ސިޓީއަކަށް ހަދަން ނިންމައި، ގަރާރުގައި ސޮއިކުރެއްވީ ކަމަށެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުން ސިޓީއެއްގެ ދަރަޖަ ދިނުމުގައި ބަލާ މިންގަނޑުގެ ތެރޭގައި އާބާދީ 10،000 އަށް ވުރެ ދަށްނުވުން ހިމެނެ އެވެ.

މިހާރުގެ ރައީސް ޑރ މުހައްމަދު މުއިއްޒު ވަނީ މިއަހަރުގެ މާޗު މަހުގެ ތެރޭގައި ހުވަދުއަތޮޅު ދެކުނުބުރީ ތިނަދޫ ކައުންސިލަކީ، "ތިނަދޫ ސިޓީ ކައުންސިލް" ގެ ގޮތުގައި އަދި "ހުވަދުއަތޮޅު ދެކުނުބުރީ ތިނަދޫ ކައުންސިލްގެ އިދާރާ" އަކީ "ތިނަދޫ ސިޓީ ކައުންސިލްގެ އިދާރާ"ގެ ގޮތުގައި ހަމަޖައްސަވާފައި އެވެ. އެނިންމުން ރައީސް ނިންމެވީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު (ޤާނޫނު ނަންބަރު 2010/7) 51 ވަނަ މާއްދާގެ (ރ) ގެ ދަށުން ކަމަށް ރައީސް އޮފީހުން މާޗު މަހުގެ 26 ވަނަ ދުވަހު ނެރުނު ދެންނެވުމެއްގައި ބުނެފައި ވެއެވެ.