ވެރިކަމަށް ޝައުގެއް ނެތް, ބޭނުމީ ރައީސް މުއިއްޒުއަށް ދެވަނަ ދައުރެއް ހޯދައިދޭން!

2028 ވަނަ އަހަރު ބާއްވާ ރިޔާސީ އިންތިހާބުގައި ވާދަކުރެއްވުމުގެ ޝައުގުވެރިކަމެއް ނުގެންގުޅުއްވާ ކަމަށް ވެރިކަން ކުރާ ޕީއެންސީގެ ޗެއާޕަސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.

ޕީއެންސީއިން މިއަދު މުޅި ރާއްޖޭގައި ކުރިޔަށް ގެންދިޔަ ކާމިޔާބު އެތެރޭގެ އިންތިހާބަށްފަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ކުރިޔަށް އޮތް ރިޔާސީ އިންތިހާބުގައި ވާދަކުރައްވާނެ ތޯ އެމަނިކުފާނާއި ސުވާލުކުރައްވާފައި އެވެ. އެސުވާލަށް ޖަވާބު ދެއްވަމުން އަބްދުއްރަހީމް ވިދާޅުވީ ރިޔާސީ އިންތިހާބެއްގައި ވާދަކުރުމުގެ އަދި ރާއްޖޭގެ ވެރިކަން ކުރުމުގެ ނުވަތަ ވެރިކަމަށް އަންނަން އުޅުމުގެ އެއްވެސް ނިޔަތެއް ނެތް ކަމަށެވެ.

"ކުރިއަށް އޮތް ތާނގަ ވެސް އެފަދަ ވިސްނުމެއް ނުގެންގުޅޭނަން، ވާދައެއް ނުވެސް ކުރާނަން، އެ ފަދަ ފުރުސަތެއް ލިބުނަސް އެކަމުން ސަލާމަތްވާނަން،" އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ ޕީއެންސީގެ އަސާސީ ގަވާއިދާ އެއްގޮތަށް 2028 ގެ ރިޔާސީ ޓިކެޓު ލިބިވަޑައިގަންނަވާނީ ރައީސް މުއިއްޒުއަށް ކަމަށާއި އެ ޕާޓީން އަމާޒު ހިފާފައި ވަނީ 2008 ވަނަ އަހަރުން ފެށިގެން އަމަލުކުރަމުންދާ ފެހި ގާނޫނުއަސާސީގެ ދަށުން ވެރިކަމުގެ ދެވަނަ ދައުރެއް ފުރިހަމަކުރައްވާ ރައީސަކަށް މިހާރުގެ ރައީސް މުއިއްޒު ހެދުމަށް ކަމަށެވެ.

ރައީސް މުއިއްޒުއާ އެމަނިކުފާނާ ދެމެދު ސިޔާސީ ނުތަނަވަސްކަމެއް އޮތް ކަމަށް ބުނެ ފެތުރޭ އަޑުތަކާއި ގުޅޭގޮތުން ނޫސްވެރިން ކުރި ސުވާލަށް ޖަވާނބު ދެއްވަމުން، އަބްދުއްރަހީމް ވިދާޅުވީ ރައީސާއެކު އޮތް ގުޅުން ދުވަހަކަށްވުރެ ދުވަހެއް ދަނީ ވަރުގަދަ ވަމުން ކަމަށެވެ.

2028 ވަނަ އަހަރުގެ ރިޔާސީ އިންތިހާބާއި ގުޅޭ ވާހަކަތައް މިއަދު ގަދަވެގެންދިޔައީ އިދިކޮޅު އެމްޑީޕީގެ ރިޔާސީ ޕްރައިމެރީގައި އެޕާޓީގެ ޗެއާޕަސަން ފައްޔާޒު އިސްމާއިލް ވާދަކުރައްވާނެ ކަން އިއުލާނުކުރެއްވުމާއި ގުޅިގެންނެވެ.