ބަންގްލަދޭޝްގައި ކުރިޔަށްދިޔަ މުޒާހަރާތަކުން ހައްޔަރުކުރި އެންމެންވެސް މިނިވަންކުރަނީ

މިދިޔަ މަހުން ފެށިގެން ބަންގްލަދޭޝްގައި ކުރަމުން އަންނަ މުޒާހަރާތަކުން ހައްޔަރުކުރި ހުރިހާ އެންމެވެސް ދޫކޮށްލުމަށް އަމުރުކޮށްފި އެވެ.

މިފަދައިން އަމުރުކުރެއްވީ ބަންގްލަދޭޝްގެ ރައީސް މުހައްމަދު ޝަހާބުއްދީން އެވެ. އެގޮތުން މި ނިންމުން ރައީސް ޝަހާބުއްދީން ނިންމެވީ އިދިކޮޅު ޕާޓީތަކުގެ މެންބަރުންނާއެކު ބޭއްވި ބައްދަލުވުމެއްގައި ކަމަށް ރިޕޯޓުތައް ބުނެއެވެ.

ރައީސް ޝަހާބުއްދީން ވަނީ މުޒާހަރާތަކުގެ ތެރެއިން ހައްޔަރުކުރި ފަރާތްތަކާއި މުޒާހަރާތަކާއި ގުޅިގެން ހައްޔަރުކުރި ދަރިވަރުންތައް ވަގުތުން ދޫކޮށްލުމަށް އެގައުމުގެ ސަލަމާތީ ބާރުތަކަށް އަމުރު ކުރައްވާފައި އެވެ.

މީގެ އިތުރުން ޖަލު ހުކުމެއްގައި ހުންނެވި ކުރީގެ ބޮޑުވަޒީރު ޚާލިދާ ޒިޔާ ވެސް މިނިވަންކުރުމަށް ރައީސް ޝަހާބުއްދީން ވަނީ އަމުރުކުރައްވާފައި އެވެ. ޚާލިދާ ޒިޔާ ޖަލަށް ލީ 2018 ވަނަ އަހަރު ކޮރަޕްޝަންގެ މައްސަލައެއްގައި އެވެ. އެގޮތުން ހާލިދާ ޒިޔާ މިރޭ މިނިވަން ކުރި އިރު ގެންދެވީ 17 އަހަރަށް ޖަލަށްލުމަށް ހުކުމް ފުރިހަމަ ކުރައްވަމުންނެވެ. މިނިވަން ކުރުމުގެ އަމުރު ނެރުނު އިރު އުމުރުން 78 އަހަރުގެ ޚާލިދާ އާލާސްކަންފުޅާއި އުޅުއްވާތީ ގެންދަވަނީ ހޮސްޕިޓަލުގައި ފަރުވާ ހޯއްދަވަމުންނެވެ.

ޒިޔާއާއި މުޒާހަރާތަކުގެ ބައިވެރިން ދޫކޮށްލަން ނިންމި މި ބައްދަލުވުމުގައި އަސްކަރިއްޔާގެ ވެރިޔާ ޖެނެރަލް ވޭކަރު-އުޒް-ޒަމާންގެ އިތުރުން ނޭވީ އާއި އެއާފޯސްގެ ވެރިޔާގެ އިތުރުން ބީއެންޕީ އާއި ޖަމިއްޔަތުއް އިސްލާމީ ޕާޓީ ހިމެނޭ ގޮތަށް އިދިކޮޅު ބައެއް ޕާޓީތަކުގެ އިސް ވެރިން ބައިވެރިވެވަޑައިގެންނެވި އެވެ.

ބަންގްލަދޭޝްގައި ފާއިތުވި 16 އަހަރު ވެރިކަންކުރި ޝެއިހް ހަސީނާ މިއަދު އިސްތިއުފާ ދެއްވުމާއި އެކު އެގައުމުގެ އިންތިގާލީ ސަރުކާރެއް ޤާއިމްކުރުމުގެ މަސައްކަތް މިހާރު ވަނީ ފަށާފައި އެވެ. އިސްތިއުފާ ދެއްވުމަށްފަހު ހަސީނާ މިހާރު ވަނީ އެގައުމު ދޫކުރައްވާ ފިއްލަވާފައި އެވެ. ހަސީނާ މިވަގުު ހިމާޔަތްހޯއްދަވަމުން ގެންދަވަނީ އެކަމަނާއާއި ގާތް ގުޅުމެއް އޮންނަ އިންޑިއާގައި އެވެ.