ހަސީނާގެ ވާދަވެރިޔާ ޚާލިދާ ޖަލުން މިނިވަންކޮށްފި

ޖަލުގައި ހުންނެވި ބަންގްލަދޭޝްގެ ކުރީގެ ބޮޑުވަޒީރު ޚާލިދާ ޒިޔާ މިހާރުން މިހާރަށް ދޫކޮށްލަން ބަންގްލަދޭޝްގެ ރައީސް މުހައްމަދު ޝަހާބުއްދީން އަމުރުކުރައްވައިފި އެވެ.

މިނިންމުން ރައީސް ޝަހާބުއްދީން ނިންމެވީ އިދިކޮޅު ޕާޓީތަކުގެ މެންބަރުންނާއެކު ބޭއްވި ބައްދަލުވުމެއްގައި ކަމަށް ބަންގްލަދޭޝްގެ ސަރުކާރުން މިރޭ ނެރުނު ނޫސްބަޔާނުގައި ބުނެފައިވެއެވެ.

ބަންގްލަދޭޝް ނޭޝަނަލިސްޓް ޕާޓީ (ބީއެންޕީ)ގެ ޗެއާޕާސަން ބޭގަމް ޚާލިދާ ޒިޔާ މިނިވަން ކުރުމުގެ އަމުރު މިހާރު ކަމާބެހޭ ފަޜާތްތަކަށް ލިބިފައިވާ ކަމަށް ރިޕޯޓުތައް ބުނެއެވެ.

ޒިޔާ ދޫކޮށްލަން ނިންމި މި ބައްދަލުވުމުގައި އަސްކަރިއްޔާގެ ވެރިޔާ ޖެނެރަލް ވޭކަރު-އުޒް-ޒަމާންގެ އިތުރުން ނޭވީ އާއި އެއާފޯސްގެ ވެރިޔާގެ އިތުރުން ބީއެންޕީ އާއި ޖަމިއްޔަތުއް އިސްލާމީ ޕާޓީ ހިމެނޭ ގޮތަށް އިދިކޮޅު ބައެއް ޕާޓީތަކުގެ އިސް ވެރިން ބައިވެރިވެވަޑައިގެންނެވި އެވެ.

ޚާލިދާ ޒިޔާ އަކީ ހަސީނާގެ އަވާމީ ލީގުގެ އެންމެ ބޮޑު އިދިކޮޅު ބަންގްލަދޭޝް ނޭޝަނަލިސްޓް ޕާޓީގެ ވެރިޔާ އެވެ. އެކަމަނާއަކީ ޝައިޚް ހަސީނާއާ ވަރަށް ބޮޑަށް ދެކޮޅު ބޭފުޅެކެވެ.

ޚާލިދާ ޒިޔާ ޖަލަށް ލީ 2018 ވަނަ އަހަރު ކޮރަޕްޝަންގެ މައްސަލައެއްގައި އެވެ. އެގޮތުން ހާލިދާ ޒިޔާ މިރޭ މިނިވަން ކުރި އިރު ގެންދެވީ 17 އަހަރަށް ޖަލަށްލުމަށް ހުކުމް ފުރިހަމަ ކުރައްވަމުންނެވެ. މިނިވަން ކުރުމުގެ އަމުރު ނެރުނު އިރު އުމުރުން 78 އަހަރުގެ ޚާލިދާ އާލާސްކަންފުޅާއި އުޅުއްވާތީ ގެންދަވަނީ ހޮސްޕިޓަލުގައި ފަރުވާ ހޯއްދަވަމުންނެވެ.

ހާލިދާ މިނިވަން ކޮށްފައިމިވަނީ އެކަމަނާގެ ވާދަވެރިޔާ ޝެއިހް ހަސީނާ ބަންގްލަދޭޝް ދާހިލީ ހަމަނުޖެހުމެއްގެ ތެރެއަށް ދޫކޮށްލެއްވުމަށްފަހު މަގާމުން އިސްތިއުފާ ދެއްވާ ގައުމުން ފިއްލެވުމުންނެވެ.

ހާލިދާ އާއި ހަސީނާއަކީ އެގައުމުގެ ވެރިކަން ފާއިތުވި 30 ވަރަކަށް އަހަރު ކުރައްވަމުން ގެންދެވި ދެބޭފުޅުންނެވެ.

އެދެމީހުންގެ ވާދަވެރިކަން ވާރުތަވީ ހަސީނާގެ ބައްޕަ ޝެއިޚް މުޖީބުއްރަހްމާންގެ ކިބައިންނާއި ޒިޔާގެ ފިރިމީހާ ޒިޔާއުރު ރަހްމާންގެ ކިބައިންނެވެ. 1975 ވަނަ އަހަރު ހަސީނާގެ ބައްޕާފުޅު މުޖީބު އަވަހާރަކޮށްލުމަށްފަހު ޒިޔާއުރު ރަހްމާން ވެރިކަމާ ހަވާލުވެވަޑައިގެންނެވުމާއި އެކު ހަސީނާއާއި ހަސީނާއަށް ވާގިވެރިވާ ފަރާތްތަކުން ތުހުމަތު ކުރީ ހަސީނާގެ ބައްޕާފުޅު އަވަހާރަކޮށްލީ ޒިޔާއުރު ރަހްމާން ފަހަތުގައި ހުންނަވައިގެން ކަމަށެވެ. ނަމަވެސް 1981 ވަނަ އަހަރު ޒިއާއުރުވެސް އަވަހާރަކޮށްލި އިރު ޒިޔާއަށް ތާއިދުކުރާ ފަރާތަކުން އިލްޒާމް އެޅުނީ ހަސީނާގެ އިސްތަށިފުޅުގައި އެވެ.