ނަތަންޔާހޫ ހައްޔަރުކުރުމުގެ އަމުރަކަށް އެދި ހުށަހެޅުމުން ރައީސްގެ މަރުހަބާ!

ހައްދުފަހަނައަޅާފައިވާ ޔަހޫދީ ދައުލަތުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރުމުގެ އަމުރަކަށް އެދި އިންޓަނޭޝަނަލް ކްރިމިނަލް ކޯޓުގެ ޕްރޮސިކިއުޓަރުން ހުށަހެޅި ހުށަހެޅުމަށް ރައީސް މުއިއްޒު މަރުހަބާ ދަންނަވައިފި އެވެ.

ރައީސް މުއިއްޒު އެކްސްގައި ކުރެއްވި ޕޯސްޓުގައި ވިދާޅުވީ މިއީ ފަލަސްތީނުގެ ރައްޔިތުންނަށް އިންސާފު ހޯދައިދިނުމަށް ކުރަމުން އަންނަ މަސައްކަތުގައި އެޅިގެންދާ މުހިންމު ފިޔަވަޅެއް ކަމަށެވެ. އަދި އެއްވެސް ޤައުމެއް ބައިނަލްއަގުވާމީގޮތުން ހެދިފައިވާ ޤާނޫނުތަކަށްވުރެ މަތި ނުވާނެ ކަމަށް ވެސް އެމަނިކުފާނު ވިދާޅުވިއެވެ.

އެގޮތުން ޔަހޫދީން އަތްގަދަކޮށްފައިވާ ފަލަސްތީނުގެ ސަރަހައްދުތަކުގައި ހަނގުރާމައިގެ ޖަރީމާތައް ހިންގަމުންދާ ފަރާތްތައް ޖަވާބުދާރީ ކުރުވަން ޖެހޭނެ ކަމަށް ވެސް ރައީސް ވިދާޅުވިއެވެ.

ޣައްޒާގައި އިޒްރޭލުން ހަނގުރާމައިގެ ޖަރީމާތަކާއި އިންސާނިއްޔަތާ ހިލާފު ޖަރީމާތައް ހިންގާފައިވާކަން ސާބިތުކުރެވޭ ވަރަށް ޕްރޮސެކިއުޓާ އޮފީހުން ހެކި ހޯދާފައިވާކަމުގެ ޔަގީންކަން ރާއްޖެއަށް އެބައޮތް ކަމަށްވެސް ރައީސް ވިދާޅުވެފައި ވެއެވެ.

މީގެ އިތުރުން ރައީސް ވަނީ ބައިނަލްއަގުވާމީ އެކި މައިދާންތަކުގައި ފަލަސްތީނުގެ ދިފާއުގައި ކުރެވެން ހުރި ހުރިހާ ކަމެއް ރާއްޖޭން ކުރައްވާނެ ކަމަށް ވިދާޅުވާ ވިދާޅުވުން ވެސް ތަކުރާރު ކުރައްވާފައެވެ.

ހަނގުރާމައިގެ ޖަރީމާތަކުގެ ތުހުމަތުގައި އިސްރާއީލުގެ ބޮޑުވަޒީރާއި އެގައުމުގެ ޑިފެންސް މިނިސްޓަރު ހައްޔަރުކުރުމުގެ އަމުރަކަށް އެދުނީ އިންޓަނޭޝަނަލް ކްރިމިނަލް ކޯޓް (އައިސީސީ)ގެ ޗީފް ޕްރޮސެކިއުޓަރ ކަރީމް ޚާން އެވެ.