ޙައްޖާއި ޢުމްރާ ދަތުރުތަކުގައި ބޭނުންކުރެވޭގޮތައް އުރީދޫއިން ޚާއްސަ ރޯމިންގ ސިމެއް ތައާރަފްކޮށްފި

ޙައްޖާއި ޢުމްރާ ދަތުރުތަކުގައި ބޭނުންކުރެވޭގޮތައް އުރީދޫއިން ޚާއްސަ ރޯމިންގ ސިމެއް ތައާރަފްކޮށްފި އެވެ.

މިއަދު ބޭއްވި ރަސްމިއްޔާތެއްގައި އުރީދޫ " ސައުދީ ޕާސްޕޯޓް" ގެ ނަމުގައި ޚާއްސަ ރޯމިންގ ސިމްގެ ހިދުމަތް އިފްތިތާހްކޮށްދެއްވީ އިސްލާމީ ކަންތައްތަކާއި ބެހޭ ވަޒީރު ޑރ ޝަހީމް އަލީ ސައީދު އާއި ހައްޖު ކޯޕަރޭޝަންގެ އެމްޑީ ޝަކީލްގެ އިތުރުން ރާއްޖެއަށް ސައުދީއިން ކަނޑައަޅުއްވާފައިވާ ސަފީރެވެ.

އިސްލާމީ ކަންތައްތަކާއި ބެހޭ ވުޒާރާއިން ބުނީ މި ޚާއްސަ ސިމް މި ޙައްޖު މޫސުމުގައި ސައުދީގައި ބޭނުންކުރެވޭނެ ކަމަށެވެ.

މިއަދުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޑރ ޝަހީމް ވިދާޅުވީ އުރީދޫ މޯލްޑިވްސްގެ ސަޢޫދީ ޕާސްޕޯޓް ޓްރެވަލް ސިމް ތަޢާރަފްކުރުމަކީ ޙައްޖުވެރިންނަށް ލުއިފަސޭހަކަމާއެކު ސައުދީ އަރަބިޔާގައި ހުރެގެން ރާއްޖެއަށް ގުޅާލުމަށް އެޅުނު ވަރަށް މުހިންމު ފިޔަވަޅެއް ކަމަށެވެ.

އުރީދޫއިން ބުނީ މިއަދު ތައާރަފްކުރި ސައުދީ ޕާސްޕޯޓް ރޯމިން ސިމަކީ އުމްރާއަށް ދާމީހުންނާއި ހައްޖުވެރިންގެ ފަސޭހައަށް ތައާރަފްކުރި ސިމެއް ކަމަށާއި މި ސިމް ސައުދީއަށް ފުރުމުގެ ކުރިން އުރީދޫއިން ގަނެވޭނެ ކަމަށެވެ. އެގޮތުން މި ސިމްގެ އަގެއްގެ ގޮތުގައި އުރީދޫއިން ކަނޑައަޅާފައިވަނީ އެއްހާސް ދިވެހި ރުފިޔާއެވެ. ސައުދީއަށް ދިޔުމަށްފަހު ސިމް ލައްވާލުވުން ރޯމިންގ ހިދުމަތް މި ސިމް މެދުވެރިކޮަށް ލިބިގެންދާނެ ކަމަށް އުރީދޫއިން ބުނެއެވެ.

މި ސިމަކީ 15 ޖީބީ ޑޭޓާ، 60 މިނެޓުގެ ކޯލުކުރުމާއި އަދި 60 އެސް.އެމް.އެސް ރޯމިންގގައި ބޭނުންކުރެވޭ ގޮތަށް ބަންޑްލް ކުރެވިފައިވާ ސިމެކެވެ. މީގެ އިތުރަށް ބޭނުން ކުރެވޭ ޑޭޓާއަށް ނަގާނީ އެމް.ބީއަކަށް 0.99ރ ކަމަށް އުރީދޫއިން ބުނެއެވެ.