ފަލަސްތީނަށް އދ ގެ ފުރިހަމަ މެމްބަރުކަން ދޭ ގަރާރު ފާސްކުރުމުން ރައީސްގެ ތައުރީފު ބައިނަލަގްވާމީ މުޖުތަމައުއަށް!

ފަލަސްތީނަށް އދ.ގެ ފުރިހަމަ މެމްބަރުކަން ދޭން ރާއްޖޭން ކޯ ސްޕޮންސާކޮށްފައިވާ ގަރާރު އދ.ގެ އާންމު މަޖިލީހުން ފާސްކުރުމާއި ގުޅިގެން ރައީސް ޑރ މުހައްމަދު މުއިއްޒު ބައިނަލަގްވާމީ މުޖުތަމައުއަށް ތައުރީފް ކުރައްވައިފި އެވެ.

ރައީސް މުއިއްޒު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ މިއަދު ކުރިޔަށް ދިޔަ އދ.ގެ ޢާންމު މަޖިލީހުގެ 10 ވަނަ ކުއްލި ޚާއްޞަ ޖަލްސާގައި، ފަލަސްޠީނުގެ ރައްޔިތުން ޢަދުލުއިންޞާފު ޤާއިމުކުރުމަށް ކުރަމުންދާ މަސައްކަތުގައި، ތާރީޚީ ކާމިޔާބީއެއް ލިބިގެންގޮސްފައިވާ ކަމަށެވެ. އެގޮތުން މިއަދުގެ ޖަލްސާގައި އދ ގައި ފަލަސްތީނަށް ފުރިހަމަ މެމްބަރުކަން ލިބޭ ގަރާރު ފާސްކުރުމަށް ބައިނަލްއަގްވާމީ މުޖުތަމައުން އެޅި މުހިންމު ފިޔަވަޅަށް ތައުރީފު ކުރައްވާ ކަމަށް ރައީސް ވިދާޅުވިއެވެ.

ފަލަސްޠީނުގެ ރައްޔިތުން ނކީ، ފަލަސްޠީނުގެ އަމިއްލަ އިޚްތިޔާރުގެ ޙައްޤު ކަށަވަރުކޮށްދިނުމަށް ކުރަމުންދާ މަސައްކަތުގައި ޒަމާނުއްސުރެ ކެތްކުރަމުން އަންނަ ބައެއްކަން ފާހަގަކުރައްވައި ރައީސް ވިދާޅުވީ ދިވެހިރާއްޖެއާއި ރައްޔިތުން ހިތްވަރު ލިބިގަންނަނީ ފަލަސްތީނުގެ ރައްޔިތުންގެ ހިތްވަރާއި ކެތްތެރިކަމުން ކަމަށެވެ.

ރައީސް ވަނީ ފަލަސްޠީނުގެ ވެރިރަށަކީ އިރުމަތީ ގުދުސް ކަމަށް 1967 ވަނަ އަހަރުގެ ކުރިން އޮތް ބޯޑަރުތަކާ އެއްގޮތްވާ ގޮތުގެ މަތިން ފަލަސްޠީނުގެ ސިޔާދަތީ އަދި މިނިވަން ދައުލަތެއްގެ ގޮތުގައި ރާއްޖެއިން ބަލައިގަންނާނެކަން ތަކުރާރު ކުރައްވާފައި އެވެ.

އ.ދ. އިން މިއަދު ބޭއްވި 10 ވަނަ ކުއްލި ބައްދަލުވުމުގައި ޔޫއޭއީ އިން ވަނީ "އެޑްމިޝަން އޮފް ނިއު މެމްބާސް ޓު ދަ ޔުނައިޓަޑް ނޭޝަންސް"ގެ ނަމުގައި ގަރާރެއް ހުށަހަޅައިފަ އެވެ. މި ގަރާރުގައި ވަނީ ފަލަސްތީނަކީ އދ.ގެ މެމްބަރަކަށް ވުމަށް ޝަރުތުހަމަވާ ގައުމެއް ކަމަށާއި އދ.ގެ އެހެން ގައުއުމުތަކުގެ ބޮޑު ތާއީދެއް މި ކަމަށް އޮންނަ ކަމަށް ފާހަގަކޮށްފަ އެވެ. ފަލަސްތީނަކީ މިހާރު އދ.ގެ 'އޮބްޒާވާ ސްޓޭޓަސް'ގެ ގައުމެކެވެ.

ރާއްޖޭން ކޯ ސްޕޮންސާކޮށް ހުށަހެޅި ގަރާރަށް މިރޭ ނެގުނު ވޯޓުގައި 143 ގައުމަކުން ވަނީ ތާއީދުކޮށްފަ އެވެ. އެ ގަރާރާ ދެކޮޅަށް ނުވަ ގައުމަކުން ވޯޓުދިންއިރު، އެއްވެސް ކޮޅަކަށް ވޯޓުދޭން 25 ގައުމަކުން ބޭނުމެއް ނުވި އެވެ.