ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅުވެސް އިސްތިއުފާ ދެއްވަނީ

ކޮމިޝަނަރ އޮފް ޕްރިޒަންސްގެ މަޤާމުން އަޙްމަދު މުޙައްމަދުފުޅު އިސްތިއުފާ ހުށަހަޅުއްވައިފިއެވެ.

މަޤާމުން އިސްތިއުފާދެއްވަން ނިންމަވާ، އަޙްމަދު މުޙައްމަދުފުޅު ވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް އިސްތިއުފާގެ ސިޓީވެސް ހުށަހަޅުއްވާފައެވެ.

މައުލޫމާތު ލިބިފައިވާ ގޮތުގައި އޭނާ މި މަޤާމުން އިސްތިއުފާދެއްވަން ހުށަހަޅާފައިވަނީ މިމަހުގެ 19 ވަނަ ދުވަހުން ފެށިގެންނެވެ.

ކޮމިޝަނަރ އޮފް ޕްރިޒަންސްގެ މަޤާމުގައި އަހުމަދު މުހައްމަދުފުޅު ވަނީ 3 އަހަރާއި 10 މަސްދުވަސް ހޭދަކުރައްވާފައެވެ. އަދި މި މުއްދަތުގައި އެކުގައި މަސައްކަތްކުރި ބޭފުޅުންގެ ފަރާތުން ލިބުނު އެއްބާރުލުމަށް އެމަނިކުފާނު ވަނީ ޝުކުރު އަދާކޮށްފައެވެ.

މަޤާމުން ވަކިވުމުގެ ކުރިން ބުރާސްފަތި ދުވަހު ހުރިހާ ޖަލުތަކަށް ޒިޔާރަތްކުރައްވާނެކަމަށްވެސް ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ވަނީ ވިދާޅުވެފައެވެ.