އަޅުގަނޑުގެ ޚާރިޖީ ސިޔާސަތަކަށް ވާނީ ކުރީގެ ރައީސް ނާސިރާއި މައުމޫން ގެންގުޅުއްވި ސިޔާސަތު - ޤާސިމް

ޖުމްހޫރީ ޕާޓީގެ ވެރިކަމެއްގައި ޚާރިޖީ ސިޔާސަތަކަށް ވާނީ ކުރީގެ ރައީސް ނާސިރާއި މައުމޫން ގެންގުޅުއްވި ސިޔާސަތު ކަމަށް އެޕާޓީގެ ރިޔާސީ ކެންޑިޑޭޓް ޤާސިމް އިބްރާހިމް ވިދާޅުވެއްޖެއެވެ.

ޤާސިމް މިހެން ވިދާޅުވީ، އަންނަ ހޮނިހިރު ދުވަހު ބާއްވާ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންނާއެކު ސަންގު ޓީވީން ރޭ ގެނެސްދިން ރިޔާސީ ބަހުސްގައި ވާހަކަ ދައްކަވަމުންނެވެ.

ޖޭޕީގެ ވެރިކަމެއްގައި ގެންގުޅޭނެ ހާރިޖީ ސިޔާސަތާ ގުޅޭ ސުވާލަށް ޖަވާބު ދެއްވަމުން، ހާރިޖީ ސިޔާސަތަކަށް ވާނީ ކުރީގެ ރައީސް އިބްރާހީމް ނާސިރާއި އަދި ކުރީގެ ރައީސް މައުމޫން އަބްދުލްގައްޔޫމް ގެންގުޅުއްވި ހާރިޖީ ސިޔާސަތު ކަން ފާހަގަކޮށް ގާސިމް ވިދާޅުވި ގޮތުގައި، ޒަމާނުއްސުރެ ރާއްޖޭން ވަނީ ހުރިހާ ގައުމަކަށް ވެސް އިހްތިރާމް ކޮށްގެން ދިވެހިންގެ މިނިވަންކަމާއި އިސްތިގްލާލް ހިފެހެއްޓިގެން އައި ސިޔާސަތެކެވެ.

"އަޅުގަނޑުމެންގެ ހާރިޖީ ސިޔާސަތުގައި އޮންނާނީ ދިވެހިންނަށް އިސްކަން ދިނުމުގެ ސިޔާސަތު. ފުރަތަމަ ވެސް، ދެވަނަ އަށް ވެސް، ތިން ވަނައަށް ވެސް. އޭގެ މާނައަކީ އިގްތިސޯދީ ކަންކަމުގައި ވެސް އިޖްތިމާއީ ކަންކަމުގައި ވެސް ދާހިލީ ކަންކަމުގައި ވެސް." ގާސިމް ވިދާޅުވި އެވެ.

ގާސިމް ގެންދަވަނީ ކެމްޕެއިނަށް ރަށްރަށަށް ވަޑައިގެން އިންޑިއާ ސިފައިން ރާއްޖޭގައި ތިބުމާ ދެކޮޅަށް ވާހަަކަ ދައްކަވަމުންނެވެ. އަދި މީގެ ކުރިން އިންޑިއާ ސިފައިން ރާއްޖޭގައި ތިބި ކަމަށް ނޭނގޭ ކަމަށްވެސް ގާސިމް ވިދާޅުވެފައިވެއެވެ.