މޫސުން ގޯސްވެ އައްޑޫ ސިޓީއަށް ރީނދޫ ސަމާލު ނެރެފި

މޫސުން ގޯސްވެ އައްޑޫ ސިޓީއަށް ރީނދޫ ސަމާލު ނެރެފިއެވެ.

މޫސުމާއިބެހޭ ގައުމީ އިދާރާއިން އެސަރަހައްދަށް ރީނދޫ ސަމާލު ނެރެފައި މިވަނީ، މީގެ ކުރިން އެ ސަރަހައްދު ހިމެނޭހެން ބޮޑުބަޔަކަށް ހުދު ސަމާލު ނެރެފައި ވަނިކޮށެވެ.

އެގޮތުން 18:30 އިން ފެށިގެން 23:30 އާ ހަމައަށް މ. އަތޮޅުން ފެށިގެން އައްޑޫ ސިޓީއާ ހަމައަށް ހުދު ސަމާލު ނެރެފައިވާއިރު، އޭގެ ތެރެއިން އައްޑޫ ސިޓީއަށް މިހާރު މިވަނީ ރީނދޫ ސަމާލު ނެރެފައެވެ.

އެގޮތުން އައްޑޫ ސިޓީއަށް 20:30 އިން ފެށިގެން 23:30 އާ ހަމައަށް ރީނދޫ ސަމާލު ނެރެފައިވަނީ، ބޯކޮށް ވާރޭ ވެހުމާއެކު ގުގުރާނެ ކަމަށް ލަފާކޮށްފައެެވެ.

މި ދުވަސްވަރު ރާއްޖޭގެ އެކި ސަރަހައްދުތަކަށް މޫސުން ގޯސްވުމާއި ގުޅިގެން ކަނޑުދަތުރު ކުރާ ފަރާތްތަކުން މޫސުމަށް ސަމާލުކަންދީގެން ދަތުރު ކުރުމަށް ކަމާ ބެހޭ އިދާރާތަކުން އިލްތިމާސްކުރެއެވެ.