ކޮވިޑް-19 ފެތުރޭ މިންވަރު 5 އިންސައްތައަށްވުރެ މަތީގައި މާލެ ފިޔަވާ 6 ރަށެއް ހިމެނޭ ކަމަށް ހެލްތު ޕްރޮޓެކްޝަން އެޖެންސީ(އެޗް.ޕީ.އޭ)އިން ވިދާޅުވެއްޖެއެވެ.
ގްރޭޓަރ މާލޭ ސަރަހައްދު ފިޔަވާ، ކޮވިޑް ކޭސްތައް ފަސް އިންސައްތައަށްވުރެ މަތި ރަށްތަކަކީ
- ބ. މާޅޮސް
- ޅ. ނައިފަރު
- ތ. ވޭމަންޑޫ
- ކ. ހުރާއާއި
- ކ. ދިއްފުށި
- އދ. މާމިގިލި
ކޮވިޑާއި ގުޅިގެން ދަތުރުފަތުރު ކުރުމުގައި ކަރަންޓީނު ކުރުމަށް އަޅައިފައިވާ ހާއްސަ ފިޔަވަޅުތަކަށް ބަދަލުގެނައުމަށް މިމަހުގެ 16 ވަނަދުވަހު އެޗްޕީއޭއިން ވަނީ ނިންމާފައެވެ.
އެގޮތުން އާބާދީގެ %60 މީހުންނަށް ވެކްސިންގެ ޑޯޒްތައް ހަމަވެފައިވާނަމަ، އެ ރަށަކަށް ކަރަންޓީނުވުމަކާ ނުލައި މިހާރު ދަތުރުކުރެވޭނެއެވެ. އަދި އާބާދީގެ %60 މީހުންނަށް ވެކްސިން ޑޯޒްތައް ހަމަވެފައިނުވާ ރަށްރަށަށް ވެކްސިންގެ 2 ޑޯޒް ފުރިހަމަކޮށް، 14 ދުވަސް ފުރިހަމަވެފައިވާ ކޮންމެ މީހަކަށް މިހާރު ކަރަންޓީނު ނުވެ ދަތުރުކުރެވޭނެއެވެ.
އެހެންނަމަވެސް އެރަށެއްގައި ބަލި އުޅޭ ނިސްބަތް ނުވަތަ ސާމްޕަލް ޕޮޒިޓިވިޓީ ރޭޓް %5 އަށްވުރެ މަތި ރަށްތަކުން އެނޫން ރަށަކަށް ދަތުރުކުރެވޭނީ ޕީ.ސީ.އާރް ނެގެޓިވް ނަތީޖާއާއި އެކުއެވެ. އަދި ވެކްސިން ޖެހުމަށް ޝަރުތު ހަމަނުވާ ކުދިން ދަތުރުކުރަން ޖެހޭނީ ޕީ.ސީ.އާރް ނެގެޓިވް ނަތީޖާއާއެކުގައި ކަމަށް އެޗް.ޕީ.އޭއިން ދިން ލުއިތަކުގައިވެއެވެ.
