ފަލަސްތީނަށް އެހީވުމަށް އާބަންކޯގެ އިވެންޓެއް މިއަދު ހަވީރު

އަރބަންކޯގެ މުވައްޒަފުންގެ ފަރާތުން ފަލަސްތީނުގެ ރައްޔިތުންނަށް އެހީވުމަށް ފަންޑް ރައިޒިންގް އިވެންޓެއް މިއަދު ރުއްގަނޑު ދޭއްގައި ކުރިއަށް ގެންދަން ނިންމައިފިއެވެ.

މި އިވެންޓް ކުރިއަށް ގެންދިއުމަށް ހަމަޖެހިފައިވަނީ ދެ ދަންފަޅިއަކަށް ބަހާލައިގެންނެވެ. އެއީ ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00އަށެވެ. މި އިވެންޓްގައި ފަންޑްރައިޒް ކުރުމުގެ އިތުރުން ފަލަސްތީނުގެ ހާލަތާއިމެދު ހޭލުންތެރިކުރުމަށް މައުލޫމާތު ދިނުމަށް ހަމަޖެހިފައިވާ ކަމަށް އާބަންކޯއިން މަޢުލޫމާތުދެއެވެ.

އަދި މި އިވެންޓްގައި، މަޢްރިބް ނަމާދުގެ ކުރިން ފަލަސްތީނުގެ ރައްޔިތުންނަށް ހާއްސަ ދުޢާއެއް ކުރެވިގެންދާނެއެވެ. މި އިވެންޓް ނިންމާލުމަށްފަހު އައިއޭސީ އަށް ޗެކް ހަވާލުކުރެވިގެންދާނެ ކަމަށްވެސް އާބަންކޯއިން ބުނެއެވެ.

އެހެންކަމުން އަރބަންކޯއިން ވަނީ ފަލަސްތީނުގައި ހާލުގައި ޖެހިފައިވާ ރައްޔިތުންނަށް އެހީވުމަށްޓަކައި ވީހާ ވެސް ގިނަ ބޭފުޅުން މި އިވެންޓްގައި ބައިވެރިވުމަށް އެދިފައެވެ.