ޝަހީމްގެ ސްޕީޑު ބާރު: އިސްލާމް ދީނަށް ޒުވާނުން ހޭލުންތެރިކަން އިތުރުކުރުމަށް ޚާއްސަ މަސައްކަތްތަކެއް ފަށަނީ!

އިސްލާމް ދީނަށް ދިވެހި ޒުވާނުންގެ މެދުގައި ހޭލުންތެރިކަން އިތުރުކުރަން ޚާއްސަ މަސައްކަތްތަކެއް ކުރަން ފެށުމަށް ތައްޔާރުވަމުން އަންނަ ކަމަށް އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރ ޝަހީމް މިއަދު ކުރެއްވި ޓުވީޓެއްގައި ވިދާޅުވީ ރައީސް ޑރ މުހައްމަދު މުއިއްޒުގެ މެނިފެސްޓޯގައި ދީނީ ހޭލުންތެރިކަން ޒުވާނުންގެ މެދުގައި އިތުރުކުރުމަށް ވައުދުވެފައިވުމާ ގުޅިގެން އިސްލާމްދީނުގެ ރުކުންތަކާއި އީމާންކަމުގެ ރުކުންތަކާއި އިސްލާމީ ޢަޤީދާއާ ގުޅޭ މުހިންމު މައުޟޫޢުތަކަށް މުޖުތަމަޢު/ ޒުވާނުން ހޭލުންތެރިކަން އިތުރުކުރުމަށް ހަދާ ދައުވާ ސްޓްރެޓެޖިކް ޕްލޭން ފައިނަލް ޑްރާފްޓް ވެފައިވާ ކަމަށެވެ.

އަދި ހޯމަ ދުވަހު މިނިސްޓްރީގެ ސީނިއަރ މެނޭޓްމަންޓް ބައްދަލުވުމުގައި ޕްލޭން އެންޑޯޒްކުރެވިގެންދާނެ ކަން ޝަހީމް ފާހަގަކުރެއްވި އެވެ.

ޝަހީމް އިތުރަށް ވިދާޅުވީ މި ޕްލޭންގައި ހިމެނޭ ހުރިހާ ފިލާވަޅުތައް ދިވެހި އަދި އިނގިރޭސި ބަހުން އެކި ޕްލެޓްފޯމްތަކުގައި ޢާއްމުކުރެވޭނެ ކަމަށާއި މީގެ ހުރިހާ މައުޟޫޢުތަކަށް ދެބަހުން ވީޑިއޯ ހަދާނީ ހަމަ ރާއްޖޭގެ ޒުވާން ޢިލްމުވެރިން ކަމަށެވެ.

އައު ސަރުކާރާއި އެކު އިސްލާމިކް މިނިސްޓްރީއާއި ޑރ ޝަހީމް ހަވާލުވެވަޑައިގެން ރާއްޖޭގެ ދީނީ ކަންކަން ކުރި އެރުވުމަށް ބޮޑެތި ބަދަލުތަކެއް ގެނައުމުގެ މަސައްކަތް ވަނީ ފަށާފައެވެ.