Screenshot 2023-07-30 at 10.48.10
އަންނަ ރިޔާސީ އިންތިހާބުގައި ވެރިކަމުގެ ދެވަނަ ދައުރަކަށް ކުރިމަތިލައްވާ ރައީސް އިބްރާހިމް މުހައްމަދު ސޯލިހު ރިޔާސީ ކެމްޕެއިނަށް މިއަދު ހަވީރު ފުވައްމުލައް ސިޓީއަށް ވަޑައިިގަންނަވާނެ އެވެ.
ރައީސް ސޯލިހް ފުވައްމުލަކަށް ވަޑައިގަތުމަށް ހަމަޖެހިފައިވަނީ މިއަދު ހަވީރު 16:00 ހާއިރު އެވެ. އެގޮތުން ރައީސް ސޯލިހަށް މަރުހަބާ ދެންނެވުމަށް ފުވައްމުލަކުގެ ރައްޔިތުން އަންނަނީ ތައްޔާރުވަމުންނެވެ.
ރައީސް ސޯލިހު މިއަދު ފުވައްމުލަކަށް ކުރައްވާ ދަތުރުފުޅުގެ ތެރެއިން އެރަށުގައި ސަރުކާރުން ކުރިޔަށް ގެންދިޔަ ދެ މަޝްރޫއެއްގެ ނިމުން ފާހަގަކުރުމަށް ވަނީ ހަމަޖެހިފައި އެވެ. އެއީ އެރަށު ދޫޑިގަން ފުޓްބޯޅަ ދަނޑު ހުޅުވުމާއި ފުވައްމުލައް ސްކޫލު ގައި އަލަށް އިމާރާތްކުރެވުނު މަލްޓި ޕާޕަސް ހޯލް ހުޅުއްވައި ދެއްވުމެވެ.
މީގެ އިތުރުން އެމަނިކުފާނުގެ ކޯލިޝަން ޕާޓްނަރެއް ކަމަށްވާ އެމްޑީއޭގެ ޕޮލިޓިކަލް ސެންޓަރެއްވެސް މިއަދު ހުޅުވުމަށް ވަނީ ހަމަޖެހިފައި އެވެ.
ރިޔާސީ ކެމްޕެއިނަށް ފުވައްމުލަކުގައި ބާއްވާ ޚާއްސަ ޖަލްސާ އޮންނާނީ މިރޭ 21:00 ގައި ފުވައްމުލަކު ސްޓޭޑިއަމްގައި އެވެ. މައުލޫމާތު ލިބޭގޮތުގައި މިރޭގެ ޖަލްސާގައި އެމަނިކުފާނުގެ ރަނިންގ މޭޓު އިއުލާނުކުރުމަށް ވަނީ ހަމަޖެހިފައި އެވެ. ނަމަވެސް އެކަން ކަށަވަރުކުރެވިފައެއް ނުވެއެވެ.
ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބަށް ރައީސް ސޯލިހް ގެންދަވަނީ ވަރަށް ބޮޑަށް ކެމްޕެއިން ކުރައްވަމުންނެވެ.
ފަހުގެ
