ކޮމިއުނިކޭޝަން، ސައިންސް އެންޑް ޓެކްނޮލޮޖީ މިނިސްޓަރު މަލީހު ޖަމާލްގެ އިތުބާރު ނެތްކަމުގެ މައްސަލައިގައި މަޖިލީހަށް ހާޒިރުވެ ޖަވާބުދާރީ ވުމަށް 14 ދުވަހުގެ ނޯޓިސް ގަވާއިދާ ހިލާފު ކަމަށް މަލީހް ވިދާޅުވެއްޖެއެވެ.
ނޯޓިސް ލިބުނުކަން ހާމަ ކުރައްވައި މަލީހު ކުރެއްވި ޓްވީޓުގައި ވިދާޅުވެފައިވަނީ ގަރާރު ތައްޔާރު ކުރެއްވި އެމްޑީޕީ ޕާލަމެންޓަރީ ގްރޫޕްގެ ލީޑަރ އަލީ އާޒިމް ވަނީ ގަރާރުގައި ސޮއި ކުރެއްވި 14 މެމްބަރުންނަށް އޮޅުވާލާފައި ކަމަށެވެ. އެހެންކަމުން ގަރާރު ބާތިލް ވާނެ ކަމަށާއި ގަރާރުގައި ވަނީ ހަމަނުޖެހޭ ދޮގު ވާހަކަތަކެއް ކަމަށް މަލީހް ވަނީ ވިދާޅުވެފައެވެ. މަލީހް އިތުރަށް ވިދާޅުވި ގޮތުގައި ގަރާރުގައި ވަރަށް ބޮޑެތި ގާނޫނީ މައްސަލަތަކެއް އެބަހުއްޓެވެ. އަދި އެކަމާ ގުޅިގެން އަލީ އާޒިމް މައްޗަށް ސުލޫކީ ފިޔަވަޅު އަޅަން ޖެހޭކަމަށްވެސް އޭނާ ވިދާޅުވިއެވެ.
Notice libijje. Kamudhaakah neiy. Garaaru thayyaarukurehvi MP Majlis ge 14 memberakah vanee olhuvaalaafa. Sulookee fiyavalhu alhan jehey. Garaaru baathilu, hamanujehey dhogu vaahaka, nan dhimaanuvey. Varah bodu qaanoonee massala thakeh. Maadhamaa notice anburaa fonuvaalaanan.
— Mohamed Maleeh Jamal (@maleehjamal) February 16, 2021
މިއަދު މަޖިލީހުން ފޮނުއްވި ނޯޓިސް މާދަމާ އަނބުރާ މަޖިލީހަށް ފޮނުއްވާނެކަމަށް މަލީހް ވަނީ ވިދާޅުވެފައެވެ.
މިނިސްޓަރު މަލީހްގެ އިތުބާރު ނެތް ކަމުގެ މައްސަލަ މަޖިލީހުގެ އިދާރާއަށް ލިބިފައިވުމާއި އެކު ޖަވާބުދާރީވުމަށް 14 ދުވަހުގެ ނޯޓިސްއެއް ފޮނުވީ މިއަދު އެވެ. އެމްޑީޕީގެ 14 މެންބަރުންގެ ސޮޔާއެކު މަލީހްގެ އިތުބާރު ނެތް މައްސަލަ މަޖިލީހަށް ވެއްދީ އެމްޑީޕީ ޕީޖީ ގްރޫޕްގެ ލީޑަރ އަލީ އާޒިމް އެވެ.
