މިއީ ހޫނުގަދަ ދުވަސްވަރަކަށް ވުމުން، ކަރަންޓު އިގްތިސާދު ކުރުމަށް ސްޓެލްކޯއިން އިލްތިމާސްކޮށްފި

މިދުވަސްވަރަކީ ރާއްޖެ ސަރަހައްދަށް ހޫނުގަދަ ދުވަސްވަރަކަށް ވުމުން، ކަރަންޓު އިގްތިސާދު ކުރުމަށް ސްޓެލްކޯއިން އިލްތިމާސްކޮށްފިއެވެ.

ސްޓެލްކޯއިން ބުނީ، މޫސުމާއި ބެހޭ ގައުމީ އިދާރާއިން ލަފާކޮށްފައިވާ ގޮތަށް މި ދުވަސްވަރަކީ ހޫނުގަދަ ދުވަސްވަރަކަށް ވުމާއި ގުޅިގެން ކޮންމެހެން ބޭނުންވާ މިންވަރަށް ކަރަންޓު ބޭނުން ކުރުމަށާއި، ކަރަންޓު އިގްތިސާދު ކުރުމަށް ހާއްސަ ސަމާލުކަމެއް ދިނުމަށް އިލްތިމާސްކުރާ ކަމަށެވެ.

އެގޮތުން، ފިނިކުރުމަށް ގެންގުޅޭ އެސީ ފަދަ އާލާތްތައް ބޭނުން ކުރުމުގައި އިތުރަށް ސަމާލުވެ، 25 ޑިގްރީއަށްވުރެ ދަށް ނުވާނެހެން ޓެމްޕަރޭޗަރ ބެހެއްޓުމަށާއި، އިލެކްޓްރޯނިކް އާލާތްތައް ގަންނައިރު، އިންވާޓަރ އަށް އިސްކަންދިނުމަށް އެކުންފުނިން ވަނީ އިލްތިމާސްކޮށްފައެވެ.

މިދުވަސްވަރަކީ ހޫނުގަދަ ދުވަސްވަރަކަށް ވުމުން، މާލެ ސަރަހައްދުގައި ކަރަންޓު ބޭނުންކުރާ އަދަދު ވަނީ މައްޗަށް ގޮސްފައި ކަމަށް ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް މިރޭ ކުރެއްވި ޓުވީޓެއްގައި ވެސް ވަނީ ވިދާޅުވެފައެވެ.

އެގޮތުން މި އޭޕްރީލް މަހުގެ 11 ވަނަ ދުވަހަކީ މިހާތަނަށް އެންމެ ގިނައިން މާލެ އޭއިރާއިން ކަރަންޓު ބޭނުންކުރި ދުވަސް ކަމަށް ޝަރީފް ވިދާޅުވިއެވެ. އެގޮތުން އެދުވަހު އެކަނި އެސަރަހައްދުން 92.5 މެގަވޯޓަށްވުރެ މައްޗަށް ދިޔަ ކަމަށް ޝަރީފް ވިދާޅުވިއެވެ.

އެގޮތުން، މާލެއިން އެކަނި އެދުވަހު 45.860 މެގަވޯޓުގެ ކަރަންޓު ވަނީ ބޭނުންކޮށްފައިވާއިރު، ހުޅުމާލެއިން ވަނީ 46.722 މެގަވޯޓުގެ ކަރަންޓު ބޭނުންކޮށްފައި ކަމަށް ޝަރީފް ކުރެއްވި ޓުވީޓުގައި ހިއްސާކޮށްފައިވާ ދުވަހުގެ ރިޕޯޓުގައިވެއެވެ.

ޝަރީފް އިތުރަށް ވިދާޅުވީ، ކުރިއަށް އޮތް ދެ ހަފްތާގައިވެސް މި އަދަދު އިތުރުވުމުގެ ފުރުސަތު ބޮޑު ކަމަށެވެ. އެހެންކަމުން ސްޓެލްކޯއިން މާލެ ސަރަހައްދަށް ކަރަންޓުގެ ހިދުމަތް ދިނުމަށް 120 މެގަވޯޓު އުފެއްދުމުގެ ގާބިލުކަން ހުރި ނަމަވެސް، ކަރަންޓު އިގްތިސާދު ކުރެއްވުމަށް ޝަރީފް އިލްތިމާސްކުރެއްވިއެވެ.