ސްޓެލްކޯގެ އިލްތިމާސް: ކަރަންޓު އިގްތިސޯދުކުރަން ޚާއްސަ ސަމާލުކަމެއްދީ!

މި ދުވަސްވަރަކީ ހޫނުގަދަ ދުވަސްތަކަކަށް ވާތީ ކަރަންޓު އިގްތިސާދު ކުރުމަށް ހާއްސަ ސަމާލުކަމެއް ދިނުމަށް ސްޓެލްކޯއިން އިލްތިމާސްކޮށްފިއެވެ.

ސްޓެލްކޯއިން މިއަދު ބުނީ އޭޕްރީލް އަދި މެއި މަހަކީ މިއަހަރު ރާއްޖެއަށް އެންމެ ހޫނު ގަދަވާނެ ދުވަސްތައް ކަމުގައި ކަމާއިބެހޭ އިދާރާތަކުން ލަފާކޮށްފައި ވެއެވެ. އަދި މިދުވަސްތައް ރޯދަ މަހާއި ދިމާވުމުން ކަރަންޓު ބޭނުންކުރާ މިންވަރު އިތުރުވެފައިވާ ކަމަށް އެކުންފުނިން ވަނީ ހާމަކޮށްފައެވެ.

ސްޓެލްކޯގެ ތަފާސް ހިސާބުތަކުން ދައްކާގޮތުގައި އެހެންދުވަސްތަކާއި ޚިލާފަށް މި ދުވަސްވަރު ޖައްވު ހޫނުވުމުގެ ސަބަބުން ރޭގަނޑުގެ ވަގުތުގައިވެސް ކަރަންޓު އުފައްދަންޖެހޭ މިންވަރު ވަނީ އިތުރުވެފައެވެ.

މިއާއި އެކު ކަރަންޓު ބޭނުންކުރުމުގައި އިތުރަށް ސަމާލުވެ ކަރަންޓު އިގްތިސާދު ކުރުމަށް ހާއްސަ ސަމާލުކަމެއް ދިނުމަށް ސްޓެލްކޯއިން ވަނީ އިލްތިމާސްކޮށްފައެވެ.

ހޫނު މޫސުމުގައި ކަރަންޓު ބިލްތަށް ބޮޑުވާތި ގިނަ ބަޔަކު ދަނީ އަބަދުވެސް ކަންބޮޑުވުން ފާޅުކުރަމުންނެވެ. ހޫނު މޫސުމުގައި ކަރަންޓް ބިލް ބޮޑުވަނީ އާންމުން ކަރަންޓް ބޭނުންކުރާ މިންވަރު އިތުރު ވުމުން ކަމަށް ސްޓެލްކޯއިން ވަނީ ބުނެފައެވެ.