ޔަހޫދީންގެ ހަމަލާތަކުގައި ޝަހީދުވި މީހުންގެ އަދަދު 33,600 އަށްވުރެ މައްޗަށް

ޔަހޫދީ އިސްރާއީލުން ދެމުންގެންދާ ހަމަލާތަކުގައި ޝަހީދުވި މީހުންގެ އަދަދު 33,600 އިން މައްޗަށް އަރައިފިއެވެ.

ޣައްޒާގައި ހުންނަ ފަލަސްތީނުގެ ސިއްހަތާބެހޭ ވުޒާރާއިން ހާމަކޮށްފައިވާ ގޮތުގައި, މިދިޔަ އޮކްޓޯބަރ މަހުގެ ހަތްވަނަ ދުވަހުން ފެށިގެން ޔަހޫދީންގެ ހަމަލާތަކުގައި މިހާތަނަށް 33,686 މީހަކު ވަނީ ޝަހީދުވެފައެވެ. ވޭތުވެދިޔަ 24 ގަޑިއިރުތެރޭ އެކަނިވެސް ޔަހޫދީންގެ ހަމަލާތަކުގައި 52 މީހަކު ވަނީ ޝަހީދުވެފައެެވެ.

ޔަހޫދީންގެ ހަމަލާތަކުގައި ޝަހީދުވި މީހުންގެ ތެރޭގައި 12,000 އަށްވުރެ ގިނަ ކުޑަކުދިން ހިމެނެއެވެ. އަދި 8,000 އަށްވުރެ ގިނަ އަންހެނުން ހިމެނޭ ކަމަށްވެސް ރިޕޯޓުތައް ބުނެއެވެ.

ޔަހޫދީންގެ ހަމަލާތަކުގައި ބިމާ ހަމަވެފައިވާ އިމާރާތްތަކުގެ ކުނިތަކުގެ ދަށުގައި 8,000 އަށްވުރެ ގިނަ މީހުން ވަޅުލެވިފައިވާ ކަމަށް ރިޕޯޓުތައް ބުނެއެވެ. އަދި ހަމަލާތަކުގައި މިހާތަނަށް 76,309 މީހުން ވަނީ ޒަޚަމްވެފައެވެ.