15 އަހަރުންދަށް ފިރިހެން: ފަސޭހަކަމާއެކު ޅ.އޭއީސީ ބަލިކޮށް ޖަމާލުއްދީން ޗެންޕިއަންކަން ހޯދައިފި

މިހާރު ކުރިއަށްދާ 7ވަނަ އިންޓަރ ސްކޫލް ހޭންޑްބޯޅަ މުބާރާތުގެ 15 އަހަރުންދަށުގެ ފިރިހެން ފައިނަލުގައި ޖަމާލުއްދީން ސްކޫލާއި ޅ.އަތޮޅު ތައުލީމީ މަރުކަޒް (ޅ.އޭއީސީ) ވާދަކުރި މެޗު ފަސޭހަކަމާއެކު 7-13 ގެ ނަތީޖާއަކުން ކާމިޔާބުކޮށް ޖަމާލުއްދީން ސްކޫލް މުބާރާތުގެ ޗެންޕިއަންކަން ހޯދައިފިއެވެ.

ޖަމާލުއްދީން ސްކޫލް މުބާރާތުގެ ފައިނަލުން ޖާގަހޯދީ ސެމީފައިނަލުގެ ފުރަތަމަ މެޗުގައި ވާދަވެރި ކުޅުމަކަށްފަހު 8-10 ގެ ނަތީޖާއަކުން އަހުމަދިއްޔާ އިންޓަނޭޝަނަލް ސްކޫލް ބަލިކުރުމަށްފަހު އެވެ. އަދި ޅ.އޭއީސީ ފައިނަލުން ޖާގަހޯދީ ސެމީފައިނަލުގެ ދެވަނަ މެޗުގައި 7-10 ގެ ނަތީޖާއަކުން ކަލާފާނު ސްކޫލް ބަލިކުރުމަށްފަހުއެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ދެލަނޑުގެ ލީޑަކާއެކު 5-3 ގެ ނަތީޖާއަކުން ޖަމާލުއްދީން ސްކޫލް ކުރީގައި އޮވެގެންނެވެ.

މެޗުގެ ދެވަނަ ހާފުގައި ޖަމާލުއްދީން ސްކޫލުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގައި އެޓީމުން އިތުރު އަށް ލަނޑު ކާމިޔާބުކުރިއިރު، މިހާފުގައި ޅ.އޭއީސީއަށް ކާމިޔާބުކުރެވުނީ ހަތަރު ލަނޑެވެ.

އެގޮތުން މިމެޗުގައި ޖަމާލުއްދީން ސްކޫލްގެ ނަޒާން ނަޒީފް އަދި މުހައްމަދު އަކުމަލް ނަސީމް މިއިން ކޮންމެ ކުޅުންތެރިއަކު ހަތަރު ލަނޑު ކާމިޔާބުކުރިއިރު، އެޓީމުގެ އަޙްމަދު މަލޫފް މުޙައްމޭ މަހުޒަމް ވަނީ ތިން ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ ނައުފު ބިން އަބްދުއް ސަމީއު އަދި މުހައްމަދު އާލް އަޝްރަފް މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ޅ.އޭއީސީގެ އަބްދުލް ހައްޔު އަޝްފާއު އަބްދުއްﷲ އަދި މުހައްމަދު އައިލާން އައިވަން މިއިން ކޮންމެ ކުޅުންތެރިއަކު ވަނީ ތިން ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު މުހައްމަދު ނާހް ހަސަން ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ ޖަމާލުއްދީން ސްކޫލްގެ މުހައްމަދު އަކުމަލް ނަސީމް އެވެ.

މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގެ 15 އަހަރުން ދަށުގެ ފިރިހެން ޑިވިޝަނުގައި ޖުމްލަ 14ޓީމަކުން ވާދަކޮށްފައިވާއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 14ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމަށް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ