ޓެކްސީ ޑްރައިވަރުންގެ މުޒާހަރާ: މާލެ-ހުޅުމާލެ ހައިވޭ ހުއްޓުމަކަށް ގެނެސްފި

ސަރުކާރާއި ދެކޮޅަށް ޓެކްސީ ޑްރައިވަރުން ކުރަމުންދާ މުޒާހަރާގެ ތެރެއިން ހަލިމަގު (ހައިވޭ) ގައި ކާރުތައް ޕާކުކޮށް ހައިވޭގެ ދަތުރުފަތުރަށް ހުރަސްއަޅައިފި އެވެ.

މިއަދު ހަވީރު މާލެ ސަރަހައްދުގެ ޓެކްސީ ޑްރައިވަރުންތައް ވަނީ އެމީހުންގެ ކަންބޮޑުވުންތައް ސަރުކާރުން އަޑު ނާހާ ކަމަށްބުނެ ސުލްހަވެރި މުޒާހަރާއަށް ނުކުމެފައެވެ. ހުޅުމާލެ ރުށްގަނޑު ޕާކު 1 ގައި ކުރިއަށް ގެންދިޔަ މި މުޒާހަރާގައި ގިނަ އަދަދެއްގެ ޓެކްސީ ޑްރައިވަރުން އެއްވެ ކަންބޮޑުވުން ފާޅުކޮށްފައިވެއެވެ.

އަދި މިރޭގެ އިޝާނަމާދަށްފަހު ކާރު ތަކުގައި މަގަށް ނުކުމެ ހުޅުމާލެއިން ހައިވޭއަށް އަރާ ހިސާބުގައި ކާރުތައް ޕާކުކޮށް ދަތުރުފަތުރަށް ވަނީ ހުރަސްއަޅާފައި އެވެ. އެސަރަހައްދުގައި ހުރި ގާފު ނޫހުގެ ރިޕޯޓަރު ބުނީ މި އިހްތިޖާޖުގައި އެސަރަހައްދުގައި ގިނަ އަދަދެއްގެ ކާރު ޕާކުކޮށްފައިވާ ކަމަށާއި ފުލުހުން އެސަރަހައްދުގައި ހަރަކާތްތެރިވަމުންދާ ކަމަށެވެ.

އެގޮތުން އެސަރަހައްދުން ދެތިން މީހަކު ފުލުހުންގެ ބެލުމުގެ ދަށަށް ގެންދިޔަ މަންޒަރު ފެނިފައިވާކަމަށް ނޫސްވެރިޔާ ބުނެއެވެ.

މި ކަމާއި ގުޅިގެން އަދި މިހާތަނަށް ފުލުހުންގެ ބަހެއް ވަނީ ލިބޭގޮތް ނުވެފައި އެވެ.