ފަސޭހަކަމާއެކު ޖަމާލުއްދީ ބަލިކޮށް އުކުޅަހު ޗެންޕިއަންކަން ހޯދައިފި

ހޭންޑްބޯޅަ މޯލްޑިވްސްގެ ފަރާތުން އިންތިޒާމްކޮށްގެން، ބޭއްވި "އިންޓަރ ސްކޫލް ހޭންޑްބޯޅަ ފިއެސްޓާ 2024" ގެ އަންހެން ޑިވިޝަން ފައިނަލުގައި މިއަދު ހަވީރު އުކުޅަހު ސްކޫލާއި ޖާމާލުއްދީން ސްކޫލް ވާދަކުރި މެޗު ފަސޭހަކަމާއެކު11-0 ގެ ނަތީޖާއަކުން ކާމިޔާބުކޮށް އުކުޅަހު ސްކޫލުން މުބާރާތުގެ ޗެންޕިއަންކަންހޯދައިފިއެވެ.

މުބާރާތުގެ ފައިނަލުން ޖާމާލުއްދީން ސްކޫލް ޖާގަހޯދީ ސެމީފައިނަލުގެ ފުރަތަމަ މެޗުގައި 2-4 ގެ ނަތީޖާއަކުން އަމީނިއްޔާ ސްކޫލް ބަލިކުރުމަށްފަހު އެވެ. އަދި އުކުޅަހު ސްކޫލް ފައިނަލުން ޖާގަހޯދީ ސެމީފައިނަލުގެ ދެވަނަ މެޗުގައި 3-7 ގެ ނަތީޖާއަކުން ތާޖުއްދީން ސްކޫލް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި މޮޅަށްކުޅެ އުކުޅަހުން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 4-0 ގެ ނަތީޖާއަކުން އުކުޅަހު ކުރީގައި އޮވެގެންނެވެ. އަދި ދެވަނަ ހާފުގައި އުކުޅަހުން އެޓީމުގެ އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ އިތުރު ހަތް ލަނޑު ކާމިޔާބުކޮށްފައެވެެ.

މިއަހަރު މުބާރާތުގެ އަންހެން ޑިވިޝަންގައި 22 ޓީމަކުން ވާދަކުރިއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 22 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ގުރޫޕް ސްޓޭޖު މެޗުތަކުގައި ޓައިމްއައުޓެއް ނެތި އަށް މިނެޓްގެ ދެހާފު ކުޅެފައިވާއިރު، ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމަށް މުބާރާތުގެ ކުއާޓާ ފައިނަލުން ވަނީ ޖާގަ ލިބިފައެވެ.