73 ޓީމާއެކު "އިންޓަރ ސްކޫލް ހޭންޑްބޯޅަ މުބާރާތް 2024" ފަށައިފި

ހޭންޑްބޯޅަ މޯލްޑިވްސްގެ ފަރާތުން އިންތިޒާމްކޮށްގެން ބާއްވާ "7 ވަނަ އިންޓަރ ސްކޫލް ހޭންޑްބޯޅަ މުބާރާތް 2024" މިއަދު ފަށައިފިއެވެ.

23 ނޮވެންބަރު 2024 އިން 11 ޑިސެންބަރު 2024 ގެ ނިޔަލަށް ކުރިއަށްދާ މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގައި 28 ސްކޫލަކުން 73 ޓީމު ބައިވެރިވެފައިވާއިރު، މުބާރާތް ކުރިއަށްދަނީ ދެ އުމުރުފުރާއަކަށް ބަހާލައިގެންނެވެ. އެގޮތުން 15 އަހަރުން ދަށާއި 17 އަހަރުން ދަށުގެ އަންހެން އަދި ފިރިހެން އުމުރުފުރާގައި ޖުމްލަ 142 މެޗު ކުޅުމަށް ވަނީ ހަމަޖެހިފައެވެ.

އެގޮތުން 15 އަހަރުން ދަށުގެ އަންހެން އުމުރުފުރާގައި 20 ޓީމު ބައިވެރިވެފައިވާއިރު، މިއުމުރުފުރާގެ މެޗުތައް ކުރިއަށްދަނީ ބައިވެރިވި 20 ޓީމު ފަސް ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން، ފަސް ގުރޫޕުން ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ތިން ޓީމަށް ވެސް މިއުމުރުފުރާގެ ކުއާޓާ ފައިނަލުން ޖާގަ ލިބިގެންދާނެއެވެ. އަދި 15 އަހަރުން ދަށުގެ ފިރިހެން ޑިވިޝަނުގައި 14 ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 14 ޓީމު ހަތަރު ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ނަތީޖާ ރަނގަޅު ދެ ޓީމަށް މިއުމުރުފުރާގެ ކުއާޓާ ފައިނަލުން ޖާގަ ލިބިގެންދާނެއެވެ.

މީގެ އިތުރުން 17 އަހަރުން ދަށުގެ އަންހެން ޑިވިޝަންގައި 23 ޓީމު ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށްދަނީ ބައިވެރިވި 23 ޓީމު ފަސް ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން، ފަސް ގުރޫޕުން ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ތިން ޓީމަށް ވެސް މިއުމުރުފުރާގެ ކުއާޓާ ފައިނަލުން ޖާގަ ލިބިގެންދާނެއެވެ. އަދި 17 އަހަރުން ދަށުގެ ފިރިހެން ޑިވިޝަނުގައި 16 ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 16 ޓީމު ހަތަރު ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ނަތީޖާ ރަނގަޅު ދެ ޓީމަށް މިއުމުރުފުރާގެ ކުއާޓާ ފައިނަލުން ޖާގަ ލިބިގެންދާނެއެވެ.