އާބަން ސެންޓަރުތައް ގާއިމްކުރާ ރަށްތަކުގެ ލިސްޓުގައި ދެކުނާއި ތިލަދުންމަތި ނެތުމުން ޝާހިދުގެ ކަންބޮޑުވުން!

ރާއްޖޭގައި އާބަން ސެންޓަރުތައް ޤާއިމްކުރާ 7 ސަރަހައްދުގެ ތެރޭގައި ބޮޑު ތިލަދުންމައްޗާއި ދެކުނުގެ ސަރަހައްދުތައް ހިމެނިފައި ނުވުމުން އެމްޑީޕީގެ ރައީސް އަބްދުالله ޝާހިދު ކަންބޮޑުވުން ފާޅުކުރައްވައިފި އެވެ.

ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން މިއަދު ވަނީ ރާއްޖޭގައި އާބަން ސެންޓަރުތައް ޤާއިމްކުރުމަށް ރައީސުލްޖުމްހޫރިއްޔާ ކަނޑައެޅުއްވި 7 ރަށް އިއުލާން ކޮށްފައެވެ. އެގޮތުން އެ 7 ރަށުގެ ތެރޭގައި ހިމެމެނީ ރ. އުނގޫފާރު , ބ. އޭދަފުށި , ޅ. ނައިފަރު, އދ. މަހިބަދޫ , ފ. ނިލަންދޫ , ދ. ކުޑަހުވަދޫ އަދި ލ. ފޮނަދޫ އެވެ.

ލިސްޓު އާންމު ކުރުމާއި އެކު ގިނަ ބަޔަކު ދަނީ މި 7 ރަށުގެ ތެރޭގައި ރާއްޖޭގެ އެންމެ އުތުރުން ތިލަދުންމައްޗާއި , ހުވަދޫއާއި ފުވައްމުލައް އަދި އައްޑޫގައި އާބަން ސެންޓަރުތައް ގާއިމްކުރަން ސަރުކާރުން ނިންމާފައިނުވާތީ ސަރުކާރަށް ފާޑުކިޔަމުންނެވެ. ނަމަވެސް ރައީސް ނިންމަވާފައިވަނީ ރާއްޖޭގެ އެންމެ އުތުރުގެ 4 އަތޮޅަކީ ޑިވެލޮޕްމަންޓު ޒޯނެއްގެ ގޮތުގައި އަދި އެންމެ ދެކުނުގެ 4 އަތޮޅުވެސް ޑިވެލޮޕްމަންޓް ޒޯނެއްގެ ގޮތުގައި ތަރައްޤީކުރުމަށް ކަމަށް އެމަނިކުފާނު ވަނީ މީގެ ކުރިން އިއުލާނުކުރައްވާފައި އެވެ.

މިކަމާއި ގުޅިގެން މިއަދު އެމްޑީޕީގެ ރައީސް އަބްދުالله ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ އަރބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައި މިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ ކަމަށް ވިދާޅުވެފައި އެވެ. އަދި މިފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމުގައިދެކޭ ކަމަށްވެސް ވިދާޅުވެފައި އެވެ.

ޝާހިދު ވިދާޅުވީ އަރބަން ސެންޓަރގެ ގޮތުގައި ރަށްތަކެއް ކަނޑައެޅުމުގެ މަޤްޞަދަކީ ލާމަރުކަޒީ ނިޒާމުން ރަށް ރަށް ހިންގުމުގެ ނިޒާމުން އެރަށްތައް ވަކިކޮށް މާލޭން ހިންގަންފެށުން ކަމުގައިވެގެން ނުވާނެ ކަމަށްވެސް ވިދާޅުވެފައި އެވެ.

އަރބަން ސެންޓަރުތައް ޤާއިމުކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވައުދުފުޅެކެވެ. އެގޮތުން ރާއްޖޭގެ އެންމެ އުތުރުގެ 4 އަތޮޅަކީ ޑިވެލޮޕްމަންޓު ޒޯނެއްގެ ގޮތުގައި އަދި އެންމެ ދެކުނުގެ 4 އަތޮޅުވެސް ޑިވެލޮޕްމަންޓް ޒޯނެއްގެ ގޮތުގައި ތަރައްޤީކުރުމާއި, މާލެސިޓީ ނުހިމަނާ އިތުރު 7 އާބަން ސެންޓަރެއް އެންމެ މަތީ ފެންވަރުގެ ޚިދުމަތްތަކާއެކު ތަރައްޤީ ކުރުމަށް ސަރުކާރުން ވަނީ ނިންމާފައެވެ.

ރައީސް މީގެ ކުރިން ވިދާޅުވެފަިއވާ ގޮތުގައި, އާބަންސެންޓަރުގައި ޞިއްޙީ ނިޒާމުގެ ތެރެއިން އެންމެ މުހިންމު ހުރިހާ ދާއިރާއަކުން ޚިދުމަތް ދެވޭ ފެންވަރަށް ތަރައްގީކުރާނެ އެވެ. އަދި ތަޢުލީމީ ނިޒާމުވެސް އެންމެ މަތީ ފެންވަރުގައި ޤާއިމުކޮށް، މަގުތައްވެސް އެންމެ ރަނގަޅަށް ހަދައި އަދި ދެންހުރި ކަންކަން ވެސް އެންމެ ރަނގަޅަށް ޤާއިމުކުރެވިފައި ހުންނާނެކަމުގައި އެމަނިކުފާނު ވިދާޅުވިއެވެ.