ތަމްރީން ދަތުރެއްގައި އިސްލާމިކް މިނިސްޓްރީގެ 22 އަންހެން މުވައްޒަފުން ސައުދީ ޢަރަބިއްޔާއަށް!

ތަމްރީން ދަތުރެއްގައި އިސްލާމީ ކަންތައްތަކާ ބެހޭ ވުޒާރާގެ 22 އަންހެން މުވައްޒަފުން ސައުދީ ޢަރަބިއްޔާއަށް ފުރައިފިއެވެ.

މި ދަތުރަކީ މައްކާގެ ވަޤުފު މުއައްސަސާއިން އިންތިޒާމްކުރާ ދަތުރެކެވެ. މި ދަތުރުގައި މުވައްޒަފުން ޢުމްރާކުރުމުގެ އިތުރުން، ޢިލްމީ ދައުރާއަކާއި، މައްކާގެ ތާރީޚީ، ދީނީ އަދި އިޖުތިމާޢީ އެކި މުއައްސަސާތަކަށް ޒިޔާރަތް ކުރުމަށް ވަނީ ހަމަޖެހިފައެވެ.

މުވައްޒަފުން މި ދަތުރަށް ފުރުމުގެ ކުރިން، ވަޒީރު ވަނީ ދަތުރުގައި ބައިވެރިވާ މުވައްޒަފުންނާއި ބައްދަލުކުރައްވާ، ދަތުރުގެ ބޭނުން ހެޔޮ ގޮތުގައި ހިއްޕެވުމަށާއި ލިބިލައްވާ ތަމްރީންތަކުގެ ބޭނުން ޢަމަލީ މައިދާނުގައި ހިއްޕެވުމަށް ނަސޭހަތްތެރިވެލައްވާފައެވެ.

މިއީ ވުޒާރާގެ މުވައްޒަފުންގެ ފެންވަރު މަތިކޮށް، އިތުރު ތަމްރީންތައް ހޯދައިދިނުމުގެ މަޤުސަދުގައި ކުރިއަށްދާ ދަތުރެކެވެ.