އިންޑިއާއަކީ ރާއްޖޭގެ ފަސްޓު ރެސްޕޮންޑާ - މޯދީ

މޫސުމަށް އަންނަ ބަދަލުތަކަށް ހައްލު ހޯދުމަށް އިންޑިއާ އާއި ރާއްޖެ ގުޅިގެން މަސައްކަތް ކުރުން މުހިންމު ކަމަށް އިންޑިއާގެ ބޮޑުވަޒީރޫ ނަރެންދުރަ މޯދީ ވިދާޅުވެއްޖެ އެވެ.

މޯދީ މިފަދައިން ވިދާޅުވީ މިހާރު ރާއްޖޭގެ ރައީސް ޑރ މުހައްމަދު މުއިއްޒު އިންޑިއާއަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން ރާއްޖެއާއި އެކު ރަސްމީ މަޝްވަރާތައް ބޭއްވުމަށް ފަހު ދެގައުމު އެކުގައި ދެއްވި ޚާއްސަ ބަޔާނުގައި އެވެ.

މި ބަޔާނުގައި މޯދީ ވަނީ އެމަނިކުފާނުގެ ހާރިޖީ ސިޔާސަތުތައް ކަމަށްވާ"ނެއިބަރހުޑް ފަސްޓް" ސިޔާސަތާއި "ސަގަރު" ވިސްނުމުގައި ރާއްޖެ އަކީ ވަރަށް މުހިންމު ޖާގައެއް އޮތް ގައުމެއްކަން ފާހަގަކުރައްވައި އިންޑިއާއަކީ އަބަދުވެސް ރާއްޖެއަށް ފަސްޓް ރެސްޕޮންޑާގެ ރޯލު އަދާކުރަމުން އަންނަ ކަން ފާހަގަކުރައްވާފައި އެވެ. އެގޮތުން ދިވެހި ރައްޔިތުންނަށް ބޭނުންވާ ޒަރޫރީ ތަކެތީގެ ބޭނުން ފުއްދުމަށް ކަމުގައި ވިޔަސް، ގުދުރަތީ ކާރިސާއެއް ދިމާވާ ވަގުތުގައި ބޯފެން ލިބޭނެ އިންތިޒާމް ހަމަޖެއްސުން ކަމުގައި ވިޔަސް އަދި ކޮވިޑުގައި ވެކްސިން ދިނުން ކަމުގައި ވިޔަސް، އަވަށްޓެރި ގައުމަކަށް ވުމުގެ ޒިންމާ އިންޑިއާ އިން އަބަދުވެސް އަދާކުރަމުންދާކަން މޯދީ ފާހަގަކުރެއްވި އެވެ.

މޯދީ ވަނީ އިންޑިއާއިން ރާއްޖެއަށް ވަމުންދާ އަދި މިފަހުން ވެފައިވާ ބައެއް އެހީތަކުގެ މައްޗަށް އަލިއަޅުއްވާލާފައި އެވެ. އޭގެ ތެރޭގައި ހިމެނެނީ

1. މިއަހަރު އެސްބީއައިއިން ރާއްޖޭގެ 100 މިލިއަން ޑޮލަރުގެ "ޓްރެޜަރީ ބިލް" ދެއްކުން ފަސްކުރުން
2. ރާއްޖެއިން އެދުނު ގޮތަށް 400 މިލިއަން ޑޮލަރާއި ތިން ހާސް ކްރޯޑް ރުޕީސްގެ ކަރަންސީ ސްވޮޕް އެގްރީމެންޓެއް ގާއިމްކުރުން
3. އަލުން ތަރައްޤީކުރި ހަނިމަދޫ އެއަރޕޯޓުގެ މަޝްރޫއު އިފްތިތާޙް ކުރުން
4. ގްރޭޓަރ މާލެ ކަނެކްޓިވިޓީ ޕްރޮޖެކްޓް ހަލުވި ސްޕީޑެއްގައި ކުރިޔަށް ގެންދިޔުން
5. ތިލަފުށީގައި އާ ވިޔަފާރި ބަނދަރެއް ހެދުމަށް އެހީތެރިކަން ފޯރުކޮށްދޭނެ ކަމުގެ ޔަގީންކަން
6. އިންޑިއާގެ އެހީގައި އިމާރާތްކުރި 700 އަށް ވުރެ ގިނަ ސޯޝަލް ހައުސިން ޔުނިޓް މިއަދު އިފްތިތާހްކުރުން
7. އިންޑިއާގެ އެހީގައި ކުރިޔަށް ގެންދިޔަ ރާއްޖޭގެ 28 ރަށެއްގެ ފެނާއި ނަރުދަމާގެ މަސައްކަތް
8. އިތުރު ހަ ރަށެއްގެ ދެނާއި ނަރުދަމާގެ ނިޒާމުގެ މަސައްކަތް ވެސް ވަރަށް އަވަހަށް ނިންމާލެވޭނެ
9. ހދ އެގްރިކަލްޗަރ އިކޮނޮމިކް ޒޯނާއި ހއ މަސް ޕްރޮސެސްކުރުމުގެ ފެސިލިޓީ ގާއިމްކުރުމަށް އެހީވާނެ
10. ރުޕޭ ކާޑު ރާއްޖެއަށް ތައާރަފްކުރުން
11. އައްޑޫގައި އިންޑިއާގެ އާ ކޮންސިއުލޭޓެއް ހުޅުވުމާއި ބެންގަލޫރުގައި ރާއްޖޭގެ އާ ކޮންސިއުލޭޓެއް ހުޅުވުމުވެ މަސައްކަތް ކުރުން
12. އެކަތަ ހާބަރު މަޝްރޫއުގެ އަމަލީ މަސައްކަތް ބާރު ސްޕީޑެއްގައި ކުރިޔަށް
13. ހައިޑްރޮގްރަފީ އާއި ޑިޒާސްޓާ ރެސްޕޮންސްގެ ދާއިރާއިން އެއްބާރުލުން އިތުރުކުރުން ސޯލާ އެންޑް އެނަރޖީ އެފިޝިއަންސީގެ ދާއިރާއިން އިންޑިއާގެ ތަޖުރިބާ އިންޑިއާއި ހިއްސާކުރާނަން

މޯދީގެ ބަޔާން ނިންމަވާލައްވަމުން އެމަނިކުފާނު ވަނީ ރާއްޖެއާއި އިންޑިއާގެ ގުޅުން އިތުރަށް ބަދަހިކުރުމަށް އިތުރު މަސައްކަތްތަކެއް ކުރައްވާނެ ކަމުގެ ޔަގީންކަންވެސް ދިވެހި ރައްޔިތުންނަށް ދެއްވާފައި އެވެ.

ރާއްޖެ އާއި އިންޑިއާގެ އެތައް ޤަރުނެއް ވެފައިވާ ގުޅުމަށް އިޝާރާތްކުރައްވަމުން، ރައީސް ޑރ މުޙައްމަދު މުޢިއްޒު، އެ މަނިކުފާނުގެ ބަޔާނުގައި ވަނީ، އެކި ދާއިރާތަކުން ދެއްވާ އެއްބާރުލުން އިތުރުކުރުމަށް ކުރައްވާ މަސައްކަތުގައި ސާބިތުވެ ހުންނެވިކަމަށް ވިދާޅުވެފައެވެ. ރާއްޖޭގެ އިޤްތިޞާދީ އަދި އިޖުތިމާޢީ ތަރައްޤީގައި އިންޑިއާއިން އަދާކުރާ މުހިންމު ދައުރަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވަނީ، އިންޑިއާއިން ރާއްޖެއަށް ކެނޑިނޭޅި ދެއްވާ އެއްބާރުލެއްވުމާއި، ކުރައްވާ ތާއީދަށްޓަކައި ބޮޑުވަޒީރު މޯދީއަށް ނިހާޔަތަށް ޝުކުރުދަންނަވާފައެވެ.

އަންނަ އަހަރަކީ ދިވެހިރާއްޖެ އާއި އިންޑިއާއާ ދެމެދު ޚާރިޖީ ގުޅުން ޤާއިމުކުރިތާ 60 އަހަރު ފުރޭ މުނާސަބާކަން ފާހަގަކުރައްވަމުން ރައީސް ވަނީ، އަންނަ އަހަރު ދިވެހިރާއްޖެ އަށް ފުރަމަނަ ދަތުރުފުޅެއް ކުރެއްވުމަށް، އިންޑިއާގެ ބޮޑުވަޒީރު ނަރެންދްރަ މޯދީއަށް ދަޢުވަތު އަރުވާފައެވެ.

ރައީސް ބަޔާން ނިންމަވާލައްވާފައިވަނީ، އިންޑިއާ އާއި ރާއްޖެ އާ ދެމެދު އޮންނަ ބަދަހިކަމުގެ ސަބަބުން، ދެ ޤައުމުގެ މުސްތަޤުބަލު އުޖާލާކުރެވޭނާކަމަށް ޔަޤީންކުރައްވާކަމަށް ވިދާޅުވަމުންނެވެ.

ރައީސް މުޢިއްޒު މިހާރު ކުރައްވަމުން ގެންދަވާ ދަތުރުފުޅަކީ އިންޑިއާގެ ރައީސް ދުރޫޕަދީ މުރްމޫގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދާއި، މަތީ ފަންތީގެ ވަފުދެއް ބައިވެރިވެވަޑައިގަންނަވެއެވެ.