އިގްތިސޯދީ އަނދަވަޅުން އަރައިގަތުމަށް އިންޑިއާގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އެބަ އޮތް - ރައީސް

ރާއްޖެއަށް ކުރިމަތިވެފައިވް އިގްތިސާދީ އަނދަވަޅުން އަރައިގަތުމަށް އިންޑިއާގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އޮތް ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ މިއަދު އިންޑިއާއަށް ފެއްޓެވި 5 ދުވަހުގެ ރަސްމީ ދަތުރުފުޅުގެ ކުރިން ބައިނަލަގްވާމީ ނޫހެއް ކަމަށްވާ ބީބީސީއަށް ދެއްވީ އިންޓަވިއުއެއްގައި އެވެ.

ރައީސް މުއިއްޒު ބީބީސީއަށް ވިދާޅުވީ، އިގްތިސާދީ ކާރިސާއަކާ ކުރިމަތިލާން ޖެހިފައިވާ މި ދަނޑިވަޅުގައި އިންޑިއާ އިން ރާއްޖެއަށް އެހީތެރިކަން ފޯރުކޮށްދޭނެ ކަމުގެ ޔަގީންކަން އެބައޮތް ކަމަށެވެ.

"އިންޑިއާއަކީ އަޅުގަނޑުމެންގެ މާލީ ހާލަތު ވަރަށް ރަނގަޅަށް ދެނެގަންނަ ގައުމެއް، ތަރައްގީގެ އެންމެ ބޮޑު ބައިވެރިއެއްގެ ހައިސިއްޔަތުން އަބަދުވެސް އިންޑިއާ އޮންނާނީ އަޅުގަނޑުމެންގެ ބުރަ ލުއިކޮށް، އަޅުގަނޑުމެންނަށް ދިމާވާ ގޮންޖެހުންތަކަށް ރަނގަޅު ގޮތްތަކެއް ހޯދުމަށާއި ހައްލު ހޯދަން،" މި ދަތުރުފުޅުގެ ކުރިން ބީބީސީއަށް ދެއްވި އީމެއިލް އިންޓަވިއުއެއްގައި ރައީސް މުއިއްޒު ވިދާޅުވި އެވެ.

ރައީސް އިތުރަށް ވިދާޅުވީ ރާއްޖެއަކީ ސޮވެރިން ޑެޓް ޑިފޯލްޓެއް އޮތް ގައުމެއް ނޫން ކަމަށާއި، މި ހާލަތުން އަރައިގަތުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ ޕްރޮގްރާމެއްގައި ރާއްޖެ ބައިވެރި ނުވާނެ ކަމަށެވެ. އަދި އިގްތިސޯދު ކޮޅަށް ޖެހުމަށް ރާއްޖޭގައި އަމިއްލަ ޕްލޭނެއް އޮތް ކަމަށާއި ދާދި އަވަހަށް އިގްތިސޯދު ރަނގަޅު ވެގެންދާނެ ކަމަށް ވެސް ރައީސް ވިދާޅުވިއެވެ.

ރައީސް މުއިއްޒު އިންޑިއާއަށް ކުރައްވާ ދަތުރުފުޅުގައި އިންޑިއާގެ ރައީސް ދުރޫޕަދީ މުރުމޫ އާއި ބޮޑު ވަޒީރު ނަރެންދްރަ މޯދީ، އަދި އެ ޤައުމުގެ އިސް ވެރިންނާ ބައްދަލުކުރެއްވުމަށް ވަނީ ހަމަޖެހިފައެވެ. މި ބައްދަލުކުރެއްވުންތަކުގައި، ދެ ޤައުމުގެ ދެމެދު އެއްބާރުލުން ގާއިމުކޮށްފައިވާ ދާއިރާތަކުން އިތުރަށް ގުޅުންބަދަހިކުރުމާ ގުޅޭގޮތުން މަޝްވަރާ ކުރައްވާނެއެވެ.

ރައީސް އިންޑިއާއަށް ކުރައްވާ މި ފުރަމާނަ ދަތުރުފުޅުގައި އިންޑިއާގެ ވެރިރަށް ނިއުދިއްލީގެ އިތުރުން، މުމްބާއީއަށާއި ބެންގަލޫރަށްވެސް ޒިޔާރަތްކުރެއްވުމަށް ވަނީ ތާވަލުކުރެވިފައެވެ.

ރައީސްގެ ދެކަނބަލުން އިންޑިއާއަށް ކުރައްވާ މި ދަތުރުފުޅަކީ އިންޑިއާގެ ރައީސް ދުރޫޕަދީ މުރުމޫގެ ދަޢުވަތަކަށް ކުރައްވާ ދަތުރުފުޅެކެވެ. އެމަނިކުފާނުގެ އަރިހުގައި، ސަރުކާރުގެ އިސް ވެރިންގެ ވަފުދެއް ބައިވެރިވެވަޑައިގަންނަވައެވެ. މި ދަތުރުފުޅުގައި ބައިވެރިވެވަޑައިގަންނަވާ ދިވެހި ވަފުދުގެ މެހުމާންދާރީގެ ހުރިހާ ކަމެއް ހަމަޖައްސަވަނީ އިންޑިއާ ސަރުކާރުންނެވެ.