ހުޅުމާލޭގައި މޮނިއުމަންޓުތަކެއް ބަހައްޓަނީ: ޑިޒައިން ކުރުމަށް ޚާއްސަ މުބާރާތެއް, އެއްވަނަ ޑިޒައިނަކަށް އެއް ލައްކަ ރުފިޔާ!

ހުޅުމާލޭގައި ބަހައްޓަން ތައްޔާރުވަމުންދާ މޮނިއުމަންޓުތައް ޑިޒައިން ކުރުމުގެ މުބާރާތެއް އެޗްޑީސީން ފަށައިފި އެވެ.

އެޗްޑީސީން މިއަދު ކުރި އިއުލާނެއްގައި ބުނީ ހުޅުމާލޭގެ ލޭންޑްސްކޭޕަށް ބޮޑެތި ބަދަލުތަކެއް ގެނައުމުގެ މަސައްކަތް އެކުންފުނިން ކުރަމުންދާ ކަމަށާއި ދިވެހީންގެ ރާއްޖޭގެ ރީތިކަން ފެންނާނެ ގޮތަކަށް ހުޅުމާލޭގެ މަގުތައް ބަދަލުކުރުމަށް މަސައްކަތް ކުރަމުންދާ ކަމަށެވެ. މިގޮތުން މިހާރުވެސް ހުޅުމާލޭގެ ފުޅާ މަގުތަކުގައި، ރައުންޑްއަބައުޓްތައް ހަދަމުންދާކަން ވަނީ ފާހަގަކޮށްފައެވެ.

މިއާއި އެކު މި ރައުންޑްއަބައުޓްތަކުގައި މޮނިއުމެންޓުތައް ބަހައްޓަން ނިންމާފައިވާކަން ހާމަކޮށް އެޗްޑީސީން ވަނި އެ މޮނިއުމެންޓުތައް ޑިޒައިންކުރުމަށް ޚާއްސަ މުބާރާތެއް އިއުލާނުކޮށްފައެވެ. އެޗްޑީސީން ބުނީ މި މުބާރާތަކީ ރާއްޖޭގެ ހުނަރުވެރި އާޓިސްޓުންނާއި ޑިޒައިނަރުންނާއި އާކިޓެކްޓުންނަށް ޚާއްސަކޮށްގެން، ދިވެހިންގެ ހިތްތަކާ ގުޅިފައިވާ ދެމެހެއްޓެނިވި އަދި ފާހަގަކޮށްލެވޭ ރައުންޑްއަބައުޓް މޮނިއުމެންޓްތަކެއް އުފެއްދުމަށް އިއުލާނުކުރި މުބާރާތެއް ކަމަށެވެ.

އަދި ދިވެހި ފަންނުވެރިންގެ މިފަދަ މަސައްކަތްތަކަށް އެކުންފުނިން އަބަދުވެސް ބަލައިގަންނަކަން ހާމަކޮށް އެޗްޑީސީން ވަނީ މި މުބާރާތުގެ އެންމެ މޮޅު ޑިޒައިނެއް ހުށަހަޅާ ފަރާތަކަށް އެއް ލައްކަ ދިވެހި ރުފިޔާގެ އިނާމެއް ދިނުމަށް. ނިންމާފައިވާކަންވެސް ހާމަކޮށްފައެވެ.

އެޗްޑީސީން އިތުރަށް ބުނީ މިއީ ހަމައެކަނި ހުނަރު ދައްކާލުމުގެ ފުރުސަތެއް ނޫން ކަމަށާއި ރާއްޖޭގެ ޖަޒީރާ ސިޓީގެ ސަގާފީ އައިޑެންޓިޓީއަށް ވެސް އެހީތެރިކަން ފޯރުކޮށްދިނުމަށް ލިބޭ ފުރުސަތެއް ކަމަށެވެ.

މި މުބާރާތަށް ޑިޒައިންތައް ހުށަހެޅުމުގެ ސުންގަޑިއަކީ އަންނަ މަހުގެ 30 ވަނަ ދުވަހެވެ.

އެޗްޑީސީން ވަނީ ހުޅުމާލޭގައި ޖުމުލަ 8 ތަނެއްގައި މޮނިއުމެންޓުތައް ބެހެއްޓުމަށް ނިންމާފައި އެވެ. އޭގެ ތެރޭގައި ހިމެނެނީ ފޭސް 1 ގެ 3 ތަނަކާއި ފޭސް 2 ގެ 5 ސަރަހައްދެކެވެ.