ގަވާއިދާ ހިލާފަށް ހިންގާ ފަޒީސް ހިޖާމާ ގެ މައްސަލަ ހެލްތު މިނިސްޓްރީން ފުލުހަށް ހުށަހަޅައިފި

ގަވާއިދާ ހިލާފަށް ހިންގާ ފަޒީސް ހިޖާމާގެ މައްސަލަ ހެލްތު މިނިސްޓްރީން ފުލުހަށް ހުށަހަޅައިފި އެވެ.

ފުލުހުން ބުނީ , ހެލްތު މިނިސްޓްރީގެ ހުއްދަ ނުހޯދާ ހިޖާމާ ޖެހުމުގެ ޚިދުމަތް ހުޅުމާލޭގައި ދޭ ކުލިނިކެއްގެ މައްސަލަ ބަލަން ފުލުހަށް ހުށަހަޅައިފައިވާ ކަމަށެވެ. ފުލުހުން ބުނީ މި މައްސަލަ މިހާރު ތަހުގީގުކުރަމުން އަންނަ ކަމަށެވެ.

މި ހިދުމަތް ހުއްޓާލުމަށް ފަޒީލާ އުސްމާނަށް ހެލްތު މިނިސްޓްރީން އަންގާފައިވަނީ އެ މިނިސްޓްރީއަށް ލިބެމުންދާ ޝަކުވާ އަށް ބަލައި އޭނާއާ ބައްދަލުކޮށް ރަޖިސްޓްރީކޮށްގެން ހިޖާމާގެ ހިދުމަތް ދިނުމަށް އެންގުމަށް ފަހުގައެވެ. އަދި ރަޖިސްޓްރީ ނުކޮށް ހިންގާނަމަ ފިޔަވަޅު އަޅާނެ ކަމަށްވެސް މިނިސްޓްރީން ވަނީ ބުނެފައެވެ.

ސޯޝަލް މިޑިއާގައި ކޮށްފައިވާ އިޝަތިހާރުތަކަކީ ވެސް މިނިސްޓްރީގެ ހުއްދަލިބިގެން މެނުވީ ނުކުރެވޭނެ ކަންކަން ކަމަށްވާތީ އެފަދަ އިޝްތިހާރުތައްވެސް ނެގުމަށާއި ސޯޝަލް މިޑިއާގައި ބަލިމީހުންގެ މެޑިކަލް ރިޕޯޓްތަކުގެ މައުލޫމާތަކީ އެންމެ ރައްކާތެރި އަދި ސައްހަ މައުލޫމާތުކަން ކަށަވަރު ނުވާތީ އެފަދަ ރިޕޯޓްތައްވެސް ސޯޝަލް މީޑިއާއިން ނެގުމަށްވެސް އަންގާފައިވެއެވެ.