ރައީސް މުއިއްޒު ގާނޫނީ ވެރިކަން ދަމަހައްޓާނެ- ނައިބު ރައީސް

ރައީސް ޑރ މުހައްމަދު މުއިއްޒު ރާއްޖޭގައި ގާނޫނީ ވެރިކަން ދަމަހައްޓަވާނެ ކަމަށް ނައިބު ރައީސް ހުސެއިން މުހައްމަދު ލަތީފް ވިދާޅުވެއްޖެ އެވެ.

ނައިބު ރައީސް މިފަދައިން ވިދާޅުވީ ގިނަ ދުވަސްތަކަކަށްފަހު ރާއްޖޭގެ ސިޔާސީ ޕޯޑިއަމްއަކުން ރައްޔިތުންނާއި މުހާތަބްކުރައްވާ ދެއްކެވި ވާހަކަފުޅުގައިއެވެ.

ޕީއެންސީގެ ހަރުގެ ޖަލްސާގައި ދެއްކެވި ވާހަކަފުޅުގައި ނައިބު ރައީސް ވިދާޅުވީ ރައީސް މުއިއްޒު ރާއްޖޭގެ ވެރިކަމާއި ހަވާލުވަޑައިގެންނެވި އިރު ރާއްޖޭގެ ދައުލަތް އޮތީ ޕެރެލައިޒްވެފައި ކަމަށާއި ދައުލަތުގެ އެކި މުވައްސަސާތަކުން އޮތީ ގައުމަށް އިހްމާލުވެފައި ކަމަށެވެ. އެގޮތުން ގައުމުގެ ކަންކަން އޮތީ ރައްޔިތުން ބޭނުންވާހާ ގޮތަކަށް ކުރަން ދޫކޮށްލެވިފައި ކަމަށް ނައިބު ރައީސް ވިދާޅުވިއެވެ.

އެކަން އެގޮތަށް ކުރުމުގެ ސަބަބުން އޭގެ ބުރަ އެންމެ ބޮޑަށް އުފުލަން ޖެހުނީ ދިވެހި ދައުލަތުގެ މާލިއްޔަތަށް ކަމަށާއި ރައީސް މުއިއްޒުގެ ވެރިކަމާއި އެކު އެންމެ ފުރަތަމަވެސް ފެއްޓެވީ ގާނޫނީ ވެރިކަން ރާއްޖޭގައި ދަމަހައްޓަވަން ކަމަށް ނައިބު ރައީސް ވިދާޅުވިއެވެ.

އަދި މިހާރު ސަރުކާރުން ކުރަމުން އަންނަ މަސައްކަތްތަކާއި އެކު ރާއްޖޭގެ މާލީ ހާލަތު ރަނގަޅުވެ ރައީސް ޑރ މުހައްމަދު މުއިއްޒު ރައްޔިތުންނަށް ވެވަަޑައިގެންނެވި ހުރިހާ ވައުދުފުޅުތަކެއް ވެރިކަމުގެ މިދައުރުގައި ފުއްދަވާނެ ކަމުގެ ފުރިހަމަ ޔަގީންކަން އޮތް ކަމަށް ނައިބު ރައީސް ފާހަގަކުރެއްވި އެވެ.