ޙައްޖުވެރިންގެ ކަންކަން ވަނީ ވަރަށް ފުރިހަމައަށް ތަރުތީބުކުރެވިފައި - ވަޒީރު ޑރ. ޝަހީމް

މިއަހަރު ރާއްޖެއިން ޙައްޖަށްދާ އެންމެހާ ޙައްޖާޖީންނާއި ގުޅޭ ހުރިހާ ކަމެއް މައްކާ އަދި މަދީނާގައި ވަރަށް ރަނގަޅަށް ފުރިހަމަކުރެވި ތަރުތީބު ކުރެވިފައިވާކަމަށް އިސްލާމީ ކަންތައްތަކާ ބެހޭ ވުޒާރާގެ ވަޒީރު، ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ޙައްޖުގެ މަތިވެރި އަޅުކަމަަށް ފުރާވަޑައިގެންނެވުމަށް އެއާޕޯޓަށް ވަޑައިގެން މީޑިއާތަކާއި ބައްދަލު ކުރައްވާ ވަޒީރު ވިދާޅުވީ، ޙައްޖުވެރިންނާއި ގުޅޭ ހުރިހާ ކަމެއްވެސް ވަރަށް ރަނގަޅަށް ފުރިހަމަ ކުރެވިފައިވާކަމަށާއި މިކަންކަމުގައި މަސައްކަތް ކުރައްވާ އެންމެހާ ފަރާތްތަކަށް ޝުކުރު އަދާ ކުރައްވާކަމަށެވެ.

ވަޒީރު އިތުރަށް ވިދާޅުވީ، މިހާތަނަށް ޙައްޖަށް ވަޑައިގެންނެވި ޙާއްޖީންގެ ތެރެއިން ފުރަތަމަ ދެ ފްލައިޓުގެ ޙާޖީން މައްކާ އަދި މަދީނާގެ ހާއްސަ ތަންތަނަށް ޒިޔާރަތް ކުރުން ކުރިއަށް ގެންގޮސްފައިވާކަމަށާއި މި ބޮޑު އޮޕަރޭޝަން ކުރިއަށްދާ ގޮތް ވަރަށް ގާތުން ބައްލަވަމުން ގެންދަވާ ކަމަށެވެ.

މިއަދު ޙައްޖަށް ފުރާ ފަހު ފްލައިޓުގައި 150 ޙާޖީން މައްކާއަށް ދިއުމަށް ވަނީ ހަމަޖެހިފައެވެ. މިިއަދު ފުރާ 150 ޙާޖީންނާއެކު މިއަހަރު ރާއްޖެއިން ޙައްޖުގެ އަޅުކަން އަދާ ކުރުމަށްދާ ޙައްޖާޖީންގެ އަދަދު 1150 އަށް އަރާނެއެވެ.