މިސްކިތްތައް މަރާމާތުކުރުމަށް 200 މިލިއަން ރުފިޔާ ބޭނުންވޭ - ޝަހީމް
# އިސްލާމީ ކަންތައްތަކާ ބެހޭ ވުޒާރާ# ޑރ. މުހައްމަދު ޝަހީމް އަލީ ސައީދު
އިސްލާމީ ކަންތައްތަކާބެހޭ ވަޒީރު ޑރ މުޙައްމަދު ޝަހީމް އަލީ ސައީދު
ރާއްޖޭގައި މިވަގުތު ހުރި ހުރިހާ މިސްކިތެއްގެ އާބާތުރަފިލުވައި މަރާމާތު ކުރުމަށް 200 މިލިއަން ރުފިޔާ ބޭނުންވާ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ވަޒީރު މިހެން ވިދާޅުވީ އިސްލާމީ ކަންތައްތަކާ ބެހޭ ވުޒާރާގެ މަސައްކަތްތަކާ ގުޅޭގޮތުން މައުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ. ވަޒީރު ޑރ. ޝަހީމް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިފަހުން ވެސް 19 މިލިއަން ރުފިޔާ ޚަރަދުވެފައިވާ ކަމަށެވެ.
އެގޮތުން، 15 މިލިއަން ރުފިޔާ ސަރުކާރުގެ ބަޖެޓުން ޚަރަދުކޮށްފައިވާއިރު މިސްކިތު ފަންޑުކަމަށް ހަތަރު މިލިއަން ރުފިޔާ ހަރަދުކޮށްފައިވާ ކަން ވަޒީރު ފާހަގަކުރެއްވިއެވެ. ވަޒީރު ވިދާޅުވީ ރާއްޖޭގެ ހުރިހާ މިސްކިތެއްގެ މަރާމާތައް ބޭނުންވާ ފައިސާ އެއްފަހަރާ ހަމަޖައްސަން ދަތިވިނަމަވެސް ބަޖެޓު ތަންދޭ މިންވަރަކުން އެ މަސައްކަތްތައް ކުރިއަށްގެންދާނެކަމަށެވެ.
"200 މިލިއަން ރުފިޔާ ބޭނުންވާ ކަމަށް މައުލޫމާތުތަކުން ދައްކާ. ރާއްޖޭގައި އެބަހުރި 700 އެއްހާ މިސްކިތް. އެހެންވީމާ ކުރެވޭ މިންވަރުން ކުރެވޭތޯ މަސައްކަތް ކުރަމުން އެބަގެންދޭ. އެންމެ މުހިންމު ކަންތައްތަކަށް އިސްކަންދީގެން ކުރިއަށް އެބަދޭ. އިރާދަކުރެއްވިއްޔާ ކުރިއަށްއޮތްތަނުގައި އަޅުގަނޑުމެން މާލެއާއި އަތޮޅުތަކުގައި ގާއިމުކުރާ ވަގުފު ޕްރޮޖެކްޓުތަކުގެ ތެރެއިން މިދާއިރާއަށް ހުރި މާލީ ދަތިކަމަށް ވަރަށް ބޮޑު ހައްލެއް އަންނާނެ،" ޝަހީމް ވިދާޅުވިއެވެ.
ވަޒީރު ވިދާޅުވީ ރައީސް ޑރ. މުޢިއްޒު ވެރިކަމާއި ހަވާލުވެވަޑައިގެންނެވި އިރު މިސްކިތްތަކުގެ މަސައްކަތްކޮށްފައިވާ ކުންފުނިތަކަށް ދައްކަންޖެހޭ 27 މިލިއަން ރުފިޔާ ނުދައްކާ އޮތްކަމަށާއި, މި ސަރުކާރުން އެފައިސާ ދައްކާ ޚަލާސްކޮށްފައިވާކަމަށްވެސް ވަޒީރު ވިދާޅުވިއެވެ.
ގުޅުންހުރި
ފާއިތުވި އަހަރު ހިންގުނު އެންމެ ހިތްހަމަޖެހޭ ޕްރޮގުރާމަކީ ޒުވާން ޚަޠީބުންގެ ޕްރޮގުރާމް - ޝަހީމް
ދާރުލް އަރުޤަމް ވަޤުފް އިމާރާތުގެ ކުރެހުން ތައްޔާރުކުރުމަށް ބަޔަކާއި ހަވާލުކޮށްފި
ދަޢުލަތުގެ ޚަރަދުގައި 50 ފަޤީރުން ޙައްޖަށް، ފުރަތަމަ އަހަރު ރައީސްގެ ވަޢުދު ފުއްދައިފި
ނެއްލައިދޫގައި ކުރިއަށް ގެންދާ ވަޤުފް މަޝްރޫޢުގެ އެއްބަސްވުމުގައި ސޮއިކޮށްފި
ފަހުގެ
