ލަލީގާ: ހަނި މޮޅަކާއިއެކު ރެއާލް މެޑްރިޑް ތާވަލު އެއްވަނައަށް

ސްޕެނިޝް ލީގުގައި ރޭ ރެއާލް މެޑްރިޑް ގެޓެފޭ އާއި ދެކޮޅަށް ކުޅުނު މެޗު 1-0 ގެ ނަތީޖާއަކުން ކާމިޔާބު ކޮށް ލީގް ތާވަލް އެއްވަނައަށް ޖެހިލާފިއެވެ.

ގެޓެފޭ ދަނޑުގައި ރޭ ކުޅުނު މި މެޗުގެ ހަމައެކަނި ގޯލް 3 ވަނަ މިނެޓްގައި ކާމިޔާބު ކޮށްދިނީ ރެއާލް މެޑްރިޑްގެ އެޑަރ މިލިޓާއޯއެވެ. މިއީ ލުކަ މޮޑްރިޗް ނަގާދިން ކޯނަރަކުން މިލިޓާއޯ ޖަހައިދިން ގޯލެކެވެ.

މެޗުގެ 58 ވަނަ މިނެޓްގައި ރެއާލުން 2 ވަނަ ގޯލެއް ޖެހިނަމަވެސް ވީއޭއާރް އިން ވަނީ އެ ގޯލަކީ އޮފްސައިޑެއް ކަމަށް ނިންމައިފައެވެ.

މި މެޗުން ބަލިވެ ގެޓާފޭ ވަނީ ތާވަލްގެ 16 ވަނައަށް ވެއްޓިފައެވެ.

ލީގުގައި މިރޭ ބާސާ އަމިއްލަ ދަނޑުގައި ސެލްޓަ ވީގޯއާއި ދެކޮޅަށް ކުޅޭ މެޗުން މޮޅުވެ، ތާވަލް އެއްވަނައަށް އެރުމުގެެ ފުރުސަތު ބާސާއަށް އެބައޮތެވެ.