ފާއިތުވި ހަފްތާގައި ރާއްޖެއިން ކޮވިޑަށް ފައްސިވީ އެންމެ 38 މީހުން!
އަހުމަދު ޝުރާއު
9/26/2022, 1:24:20 PM
breaking ބްރޭކިންގް
ފާއިތުވެދިޔަ ހަފްތާގައި ރާއްޖެއިން ކޮވިޑް-19 އަށް ފައްސިވެފައި ވަނީ އެންމެ 38 މީހުން ކަމަށް ހެލްތް ޕްރޮޓަކްޝަން އޭޖެންސީގެ ތަފާސްހިސާބުތަކުން ދައްކައިފިއެވެ.
މިއަދު އެޗްޕީއޭއިން އާންމުކުރި 18 ސެޕްޓެމްބަރުން ފެށިގެން 24 ސެޕްޓެމްބަރުގެ ތަފާސްހިސާބުތަކުން ދައްކާގޮތުގައި ފައްސިވި 38 މީހުންގެ ތެރެއިން 17 މީހުންނަނަކީ މާލެ ސަރަހައްދުން ފައްސިވި މީހުންނެވެ. އަދި ވޭތުވެދިޔަ ހަފްތާގައި އަތޮޅުތަކުން އެއްވެސް ރަށަކުން މީހަކު ފައްސިވެފައި ނުވެއެވެ. ރިސޯޓްތަކާއި، ސިނާއީ ރަށްތަކުން ވޭތުވެދިޔަ ހަފްތާގައި ފައްސިވެފައިވަނީ އެންމެ 21 މީހުންނެވެ.
ތަފާސްހިސާބުތަކުން ދައްކާގޮތުގައި ކޮވިޑްގެ ސަބަބުން މިހާރު ހޮސްޕިޓަލުގައި އެޑްމިޓްކުރެވި ފަރުވާ ދެމުންދަނީ އެންމެ 3 މީހުންނަށެވެ.
ވޭތުވެދިޔަ ހަފްތާގެ ކުރީ ހަފްތާގައިވެސް ރާއްޖެއިން ފައްސިވީ އެންމެ 38 މީހުންނެވެ. އެހަފްތާގައި ހޮސްޕިޓަލުގައި އެޑްމިޓްކުރެވި ފަރުވާދެވިފައިވަނީ އެންމެ މީހަކަށެވެ.
ކޮވިޑްގެ ތަފާސްހިސާބުތަށް އެޗްޕީއޭއިން މިހާރު އިއުލާނުކުރަމުން އަންނަނީ ކޮންމެ ހަފްތާއަކު އެއްފަހަރުއެވެ.