large_167533171213zfwS
އިންޑިއާގެ ކޮޗިންއިން ގެއްލިގެން ހޯދަމުން ދިޔަ ދިވެހި މީހާ ފެނިއްޖެ އެވެ.
އިންޑިއާއިން ގެއްލިގެން ހޯދަމުން ދިޔައީ މަހުދީ ނަމަކަށް ކިޔާ ކ. ތުލުސްދު އަށް ނިސްބަތްވާ މީހެކެވެ. އޭނާ ގެއްލުނީ މިދިޔަ އަންގާރަ ދުވަހު ހެނދުނު 9 ޖަހާ އެހާކަންހާއިރު، ޑޮކްޓަރަށް ދެއްކުމަށް އަމްރީތާ ހޮސްޕިޓަލަށް ގޮސް ހުއްޓައެވެ.
މަހުދީގެ އާއިލީ މީހަކު މީސްމީޑިއާގައި މިއަދު ބުނެފައިވަނީ މަހުދީ ދާދި ދެންމެ އަކު ފެނިފައިވާ ކަމަށެވެ. އަދި އޭނާގެ ހާލު ރަނގަޅުކަމަށްވެސް ވަނީ ބުނެފައެވެ.
މައުލޫމާތު ލިބޭގޮތުގައި މަހުދީ މިވަގުތު ހުރީ ކޮޗިންގެ ޕޮލިސް ސްޓޭޝަނެއްގައެވެ.
މަހުދީ ގެއްލުމާ ގުޅިގެން އެކަން އިންޑިއާ ފުލުހުންނާއި ދިވެހިން ފުލުހުންނާއި ރާއްޖޭގެ ފޮރިން މިނިސްޓްރީއަށް ވެސް އާއިލާ އިން މައުލޫމާތު ހިއްސާކުރި އެވެ. އަދި އޭނާ ހޯދުމުގެ މަސައްކަތް ފޮރިން މިނިސްޓްރީއިން ވަނީ އިންޑިއާގެ ކަމާބެހޭ އިދާރާތަކާއި ގުޅިގެން ކޮށްފައެވެ.